د معلولیت لرونکو وګړو کره شمېر به تثبیت شي
د معلولیت لرونکو وګړو کره شمېر به تثبیت شي
د شهیدانو او معلولینو په چارو کې د دولت وزارت د معلولینو چارو رییس ښاغلي وحیدالله صافي تېره ورځ د مرکزي احصایې د خپلواکې ادارې له مسولې آغلې لطیفې شریفي سره په خپل کاري دفتر کې وکتل.
د مېرمن شریفي د دغې لیدنې موخه په افغانستان کې د نارینه او ښځینه معلولیت لرونکو وګړو د کره شمېرې د تثبیتولو او یاد قشر ته د وزارت د خدمتونو د وړاندې کولو په اړه د معلوماتو ترلاسه کول و. له دې لیدنې وروسته به یاده اداره د یوه رسمي مکتوب له لارې د معلولیت لرونکو وګړو د دقیقې شمېرې معلومولو په اړه خپل کار پیل کړي.
ښاغلي صافي د مرکزي احصایې خپلواکې ادارې مسولینو ته د شهیدانو او معلولینو په چارو کې د دولت وزارت د فعالیتونو او لاسته راوړنو په اړه معلومات ورکول وویل: د شهیدانو او معلولینو په چارو کې د دولت وزارت یوه نوې رامنځته شوې اداره ده، خو په همدې کمه موده کې یې د پام وړ کارونه لکه د بایومتریک سیستم فعالول او پلي کول، د روڼتیا رامنځته کول، فساد سره مبارزه، د کاري پروسو اسانه او ساده کول او ... ترسره کړي دي او ژمن دی، چې یاد قشر ته د ژوند په ټولو برخو کې اړین او بنسټیز کارونه وکړي.
ښاغلي صافي د یادې ادارې دا ګام وستایه او په دې برخه کې یې د وزارت د همکارۍ او ملاتړ ډاډ ورکړ.
