د غزني ولايت د شهیدانو او معلولینو چارو رئيس د ياد ولايت دوو ولسوالیو ته سفرونه ترسره کړل
د غزني ولايت د شهیدانو او معلولینو چارو رئيس محترم ملا عبدالحکیم دانش په مشرۍ يو پلاوي ده یک او اندړو ولسواليو ته د سفرونو په ترڅ کې د مجردو شهیدانو کورنیو سره له نږدې ليدنه وکړه، د هغوی احوال یې له نږدې واخیست، د هغوی ستونزې او غوښتنې یې واوریدې او اړتیاوو ته یې د بشپړې رسېدنې ډاډ ورکړ.
هغه همداراز د یادو کورنیو د اقتصادي ستونزو د حل په موخه یو اندازه نغدي مرستې هم ترسره کړې، له ټولو یې د اسلامي نظام د بقاء لپاره او د امارت د رهبرۍ د حفاظت د دعاء غوښتنه وکړه.
همداراز نوموړي یتیمانو، کونډو او معلولینو ته د اغېزمنو خدمتونو وړاندې کولو او د هغوی د کور په کور سروې د بهير د لا ښه والي په موخه اړوندو مدیرانو ته یې لازمې لارښوونې وکړې.
د دې سفرونو پر مهال د شهیدانو او معلولینو چارو رئيس د یادو ولسوالیو له مسؤلينو سره وکتل او د هغوی څخه یې د شهیدانو کورنیو او معلولینو ته د لا خدمتونو وړاندې کولو په برخه کې د تل په څېر د نورو همکاریو غوښتنه وکړه.
