د شهیدانو ورثه وو او معلولینو د پالنې مرکز لپاره نوی رئیس معرفي او خپلې چارې پیل کړې
د ریاست الوزراء عالي مقام د حکم پر اساس او د شهیدانو او معلولینو چارو وزارت د وړاندیز له مخې، محترم مولوي احسان الله حقاني د شهیدانو ورثه وو او معلولینو د پالنې په مرکز کې د نوي رئیس په توګه کارکوونکو رسماً معرفي او خپله دنده یې پیل کړه.
په همدې موخه جوړ شوي پروګرام کې د شهیدانو او معلولینو چارو وزارت د کارکوونکو چارو رئیس محترم مولوي محمد موسی صدیقي، د شهیدانو چارو رئیس محترم مولوي روح الله نصرت، د پلان او بهرنیو اړیکو رئیس محترم ملا صدوخان حق شناس، د آسایشګاه آمر محترم ملا سید محمد آخند، د فني او حرفوي زده کړو آمر محترم سید تمیم آغا او د یاد مرکز اړوند ټولو کارکوونکو حضور درلود.
په دې پروګرام کې د کارکوونکو چارو رئیس محترم مولوي محمد موسی صدیقي د یو لړ مهمو اداري مسایلو په تړاو هر اړخیزې خبرې وکړې، په پوره اخلاص، صداقت، د پلان او د دندو لایحو سره سم د ورسپارل شویو مسؤلیتونو ترسره کول یې په هر اداره کې د بریا بنسټیز عناصر یاد کړل.
نوموړي د شهیدانو ورثه وو او معلولینو د پالنې مرکز د پخواني رئیس هلې ځلې وستایلې او کارکوونکو ته یې سپارښتنه وکړه چې په اخلاص، همغږۍ، مشورو او یووالي سره، خپلې دندې ترسره کړي، له مشرانو اطاعت وکړي او د مسؤلیتونو په ترسره کولو کې بشپړه ژمنتیا وښيي.
محترم مولوي محمد موسی صدیقي کارکوونکو ته وویل: د شهیدانو وارثینو او معلولینو ته پر وخت، مؤثر او صادقانه خدمت کول، یو ستر مسؤلیت دی، له هغوی وغوښتل چې خپل وخت بېځایه تېر نه کړي، د دندو په ترسره کولو کې له پخوا زیات هوډ، دقت او نظم راولي.
په دې پروګرام کې د شهیدانو چارو رئیس محترم مولوي روح الله نصرت نوي رئیس ته یې د ټاکل کیدو مبارکۍ وویله او څرګنده یې کړه چې سپارل شوي مسؤلیتونه باید په دقیق او اغېزمنه توګه ترسره شي، ځکه چې د شهیدانو ورثه وو او معلولینو ته پر وخت د ښو خدمتونو وړاندې کول یو مهم مسؤلیت دی او له ټولو کارکوونکو یې وغوښتل چې له بشپړۍ ژمنتیا سره د دې اړمن قشر ستونزو ته رسیدګي وکړي.
وروسته د پلان او بهرنیو اړیکو رئیس محترم ملا صدوخان حق شناس، د فني او حرفوي پروګرامونو پر اهمیت خبرې وکړې او دې ډول پروګرامونو په لاره اچول یې د یتیمانو او معلولینو د اقتصادي ځان بسیاینې په برخه کې خورا مهم وباله او له اړوندو کارکوونکو یې وغوښتل چې د دې ډول پروګرامونو د پراختیا لپاره خپل فعالیتونه لا ډیر کړي تر څو د شهیدانو وارثینو او معلولینو لپاره د ودې او پرمختګ زمینه برابره شي.
د یادونې وړ ده چې محترم مولوي احسان الله حقاني چې اوس د شهیدانو ورثه وو او معلولینو د پالنې مرکز د نوي رئیس په توګه معرفي شوی، تر دې وړاندې د وزارت د کورنۍ پلټنې د رئیس په توګه دنده ترسره کوله او په دې موده کې خپلې دندې او سپارل شوي مسؤلیتونه په پوره بریا، ژمنتیا او دقت سره سرته رسولي او د پام وړ خدمتونه یې تر سره کړې دي.
