د شهیدانو او معلولینو چارو په وزارت کې له (۱۱) تنو کارکوونکو څخه د کمپیوټر ازموینه واخیستل شوه
د شهیدانو او معلولینو چارو وزارت د کارکوونکو چارو ریاست له لوري د دې وزارت اړوند (۱۱) تنو کارکوونکو ته د کاري ظرفیتونو لوړولو په موخه یو میاشت وړاندې د کمپیوټر د پاورپاینټ پروګرام تدریس پېل شوی وو، چې د یوه پروګرام په ترڅ کې د هغوی څخه ازموینه واخیستل شوه.
د یادونې وړ ده چې له دې وړاندې هم د شهیدانو او معلولینو چارو وزارت د کارکوونکو چارو ریاست له لوري د کارکوونکو د کاري وړتیاوو لوړولو په موخه د مدیریت، اداري مراسلاتو، د کمپیوټر د مهارتونو زده کړې او په نورو برخو کې ګڼ شمېر روزنیز پروګرامونه په لاره اچول شوي دي. دغه پروګرامونه د کارکوونکو د پوهې په لوړولو، مسلکي وړتیاوو زیاتولو او د اداري چارو په ښه والي کې یې مهم رول لوبولی دی او د دې زمینه یې برابره کړې چې د شهیدانو کورنیو او معلولینو ته غوره او اغېزمن خدمتونه وړاندې شي.
