د شهیدانو او معلولینو چارو په وزارت کې د دوو آمریتونو لپاره نوي آمرین معرفي او خپلې دندې رسماً پیل کړې
د شهیدانو او معلولینو چارو وزارت د مقام د حکم پر اساس، محترم مولوي علي احمد د دعوت او ارشاد ریاست اړوند په درېیم بست کې د مدرس په توګه، د کارکوونکو د چارو رئيس محترم مولوي محمد موسی صدیقي له لوري او همداراز محترم مولوي عبدالمنان د معلولینو د بیاځواکمنتیا ریاست د ذهني او رواني څانګې د آمر په توګه د استخدام آمر محترم مولوي عبدالصمد حماد له خوا معرفي او خپلې دندې یې رسماً پېل کړې.
د ذهني او رواني څانګې د نوي آمر د معرفي په غونډه کې، د معلولینو د بیاځواکمنتیا رئیس محترم مولوي عبدالنافع منتفع، نوي آمر ته یې د ټاکل کېدو مبارکي وویله او ډاډ یې ورکړ چې سپارل شوې چارې به د بشپړې همغږۍ او همکارۍ په فضا کې ترسره شي.
همداراز د شهیدانو او معلولینو چارو وزارت د استخدام آمر محترم مولوي عبدالصمد حماد د ذهني او رواني څانګې نوي آمر ته د چارو په ترسره کولو کې د بریالیتوب هیله څرګنده کړه، هغه همداراز له اړوندو کارکوونکو څخه وغوښتل چې خپلې سپارل شوې دندې په پوره همغږۍ ترسره کړي او د خپل آمر څخه اطاعت وکړي تر څو ټاکل شوې موخې په ښه توګه ترلاسه شي.
په دې معرفي غونډه کې د وزارت اړوند د جومات امام محترم حافظ محمد اقبال هم خبرې وکړې او څرګنده یې کړه چې په ادارو کې تغییر او تبدیل د اسلامي امارت د پالیسۍ له مخې ترسره کېږي، او هلته چې اړتیا ولیدل شي، وړ او تجربه لرونکي کسان د اړوندو بستونو لپاره معرفي کېږي.
