د شهیدانو او معلولینو چارو وزارت کارکوونکو ته په جماعت سره د لمانځه اداء کولو او د اسلامي شریعت مطابق د سیرت او صورت د برابرولو په اړه د عالیقدر امیرالمؤمنین حفظه الله تعالی حکم ابلاغ شو
د شهیدانو او معلولینو چارو وزارت د دعوت او ارشاد رئیس محترم مفتي عبدالاحد مسعود له لوري نن د ماسپښین لمانځه وروسته د دغه وزارت محترمو رئیسانو، آمرینو او کارکوونکو ته د اسلامي شریعت مطابق د سیرت او صورت د برابرولو او په جماعت سره د لمانځه اداء کولو په اړه د عالیقدر امیرالمؤمنین حفظهالله تعالی حکم ابلاغ شو.
په یاد حکم کې راغلي چې ټول کارکوونکي مکلف دي خپل سیرت او صورت د اسلامي شریعت له احکامو سره سم برابر کړي او په جماعت سره لمانځه کې په منظم ډول ګډون وکړي.
همداراز په حکم کې ټینګار شوی چې ټول کارکوونکي دې خولۍ پر سر کړي او د لمانځه د اداء کولو پر مهال دې د لنګوټو تړلو التزام وکړي.
په حکم کې همداراز راغلي چې د ټولو کارکوونکو د سر وېښتان او ږیره باید د اسلامي شریعت مطابق وي. هغه کارکوونکي چې سیرت او صورت یې د اسلامي شریعت خلاف وي، د ټاکل شوي هیئت له لوري به ورته مناسب تعزیر ورکول کېږي چې له جملې څخه یې د معاش تعطیل، د دندې تعطیل، د بست تنزیل او انفکاک یاد شوي دي.
محترم مفتي عبدالاحد مسعود د عالیقدر امیرالمؤمنین حفظهالله تعالی د حکم هره برخه په تفصیل سره کارکوونکو ته تشریح کړه او له هغوی څخه یې وغوښتل چې یاد شوي موارد په جدي توګه رعایت کړي، تر څو په دنیا او آخرت کې یې د خیر، برکت او بریا سبب وګرځي.
