د شهیدانو او معلولینو چارو وزارت محترم معینانو او رئیسانو په کندهار ولایت کې د وزارتونو د مسؤلینو لپاره په جوړ شوي درې ورځیني سیمینار کې ګډون وکړ
په کندهار ولایت کې د وزارتونو د مسؤلینو لپاره په جوړ شوي ځانګړي سیمینار کې د شهیدانو او معلولینو چارو وزارت د تخنیکي او مسلکي چارو مرستیال محترم الحاج ملا عبدالرزاق آخند، د شهیدانو او معلولینو چارو مرستیال محترم شیخ صاحب عبدالحکیم حقاني، د مالي او اداري چارو عمومي رئیس محترم مولوي کلیم الله افغان او د یاد وزارت ټولو مرکزي او ولایتي رئیسـانو ګډون کړی وو.
په دې سیمینار کې عالیقدر امیرالمؤمنین حفظه الله تعالی ګډونوالو ته لازم هدایات، مهمې سپارښتنې او هر اړخیزې توصیې وکړې، عالیقدر امیر المؤمنین صاحب د مسؤلینو خدمتونه وستایل او د قرآن کریم او د نبوي صلی الله علیه و سلم سنتو په رڼا کې یې تفصیلي ویناوې وکړې.
عالیقدر امیرالمؤمنین حفظه الله تعالی د وزارتونو مسؤلینو ته وفرمایل: خیر الناس من ینفع الناس، په خلکو کې د خیر خلک هغه دي، چې خلکو ته یې نفع رسېږي. اسلامي امارت د مسلمانانو د وکالت او نمائنده ګۍ مقام دی، اسلامي امارت به د مسلمانانو د دين او عقیدې ساتنه کوي، خلکو ته به دین او شریعت ورښيي، د خلکو امنیت به ساتي، د یتیمانو، کونډو، غریبانو، بې سرپرسته کورنیو کفالت به کوي.
همداراز عالیقدر امیرالمؤمنین حفظه الله تعالی وویل: د شهیدانو او معلولینو وزارت هر کال یتیمانو، کونډو او معلولینو ته مقرره ماهانه ورکوي، همدارنګه اسلامي امارت په یوه فرمان کې یاد وزارت ته فوق العاده امر کړی دی، چې د دوو اندامو معلول سره نغدي مرستې ترسره کړي او د مجردو شهیدانو کورنیو ته هم امتیاز ورکړي.
په پای کې ټولو علماء کرامو او مسؤلینو یوځل بیا له عالیقدر امیرالمؤمنین حفظه الله تعالی سره خپل بیعت تجدید کړ او ژمنه یې وکړه چې د خپل شرعي نظام کلک ملاتړي دي او ملاتړي به وي.
