د شهیدانو او معلولینو چارو وزارت سرپرست وزیر محترم الحاج ملا عبدالمجید آخند جوزجان ولایت ته سفر وکړ
د شهیدانو او معلولینو چارو سرپرست وزیر محترم الحاج ملا عبدالمجید آخند د دې سفر په ترڅ کې د جوزجان ولایت د شهیدانو او معلولینو چارو ریاست د کاري بهیر د ارزونې ترڅنګ د فدایانو کورنېو لیدو او پوښتنې ته ورغی، د هغوی ستونزې یې واوریدې، د شهیدانو پاک روح ته یې دعا وکړه او د هغوی کورنېو سره یې نغدي مرستې ترسره کړې.
محترم الحاج ملا عبدالمجید اخند جوزجان ولایت ته یې د خپل سفر اصلي موخه د شهيدانو او معلولینو چارو ریاست د فعالیتونو ارزونه وبلله او کارکوونکو سره یې په کتنه کې وویل:
دې ولایت ته زموږ د سفر یوه مهمه موخه د شهیدانو او معلولینو له کورنیو سره لیده کاته د هغوی ستونزې له نږدې اوریدل او د هغوی غوښتنو او ستونزو ته رسیدګي ده.
همدارنګه وزیر صاحب د شهیدانو او معلولینو له کورنیو سره په کتنه کې ډاډ ورکړ چې د دوی اړتیاوو او ستونزو ته به پاملرنه وشي او زياته یې کړه: د اسلامي امارت نظام د مجاهدینو په قربانیو او د ولس په همکارۍ سره را منځته شوی دی او د اسلامي امارت مسؤلین هڅه کوي تر څو د خلکو ستونزې او اړتیاوې د خپل وس مطابق رسیدګي وکړي.
هغه همداراز د شهيدانو وارثينو او معلولينو ته د لا ښه خدمتونو د وړاندې کولو په موخه د ياد رياست مسؤلينو ته لازم هدايات ورکړل.
د دې کتنې پر مهال د جوزجان ولايت د شهيدانو او معلولينو چارو رئيس محترم مولوي شبير احمد د ياد رياست د فعاليتونو او کړنو په اړه د راپور وړاندې کولو په ترڅ کې د شهيدانو او معلولينو کورنيو ستونزو او غوښتنو ته د پوره رسيدګي ډاډ ورکړ.
په ورته وخت کې د شهیدانو یو شمېر کورنیو او معلولینو هم د اسلامي امارت له ځانګړې پاملرنې څخه مننه وکړه.
په دې سفر کې چې د وزارت د مالي او حسابي چارو رئیس محترم مولوي محمد امین دروېش، د خاصو شهیدانو آمر محترم مولوي محمد او د ډېټابېس او معلوماتو رياست د پروژې مالي مسؤل محترم مولوي شبیر احمد د محترم وزیر صاحب ملتیا کوله، د هغو معلولینو لیدو ته هم ورغلل چې د تېر شل کلن جهاد پر مهال یې د خپل بدن دوه غړي له لاسه ورکړي وو، د هغوی ستونزې هم واوریدل شوې او ورسره نغدي مرستې ترسره شوې.
د یادونې وړ ده چې تېره ورځ هم د شهیدانو او معلولینو چارو محترم وزیر په بلخ ولایت کې د فدایانو کورنېو سره له نږدي کتلي وو، او هغوی یې سره نغدي مرستې ترسره کړې وې.
