د شهیدانو او معلولینو چارو وزارت د (۶۴) تنو کارکوونکو لپاره د کاري مهارتونو د لوړولو په موخه ښوونیز سیمینار پیل شو

د شهیدانو او معلولینو چارو وزارت د کارکوونکو چارو ریاست د (ASPS) مرستندویه مؤسسې په همغږۍ د (۶۴) تنو کارکوونکو د کاري مهارتونو د لوړولو په موخه ښوونیز سیمینار پیل کړ.

په دې سیمینار کې د وزارت مرکزي کارکوونکو ته مهم موضوعات لکه د ادارې او مدیریت اصول، اداري مراسلات، مالي مدیریت، پروپوزل لیکنه او همدارنګه د څارنې او ارزونې په برخو کې د مجربو استادانو له‌ خوا تدریس کېږي.

د سیمینار د پرانیستې په پروګرامکې د مالي او اداري چارو عمومي رئیس محترم مولوي کلیم‌الله افغان، د کارکوونکو چارو رئیس محترم مولوي محمد موسی صدیقي، د دعوت او ارشاد رئیس محترم مفتي عبدالاحد مسعود، د (ASPS) مؤسسې رئیس محترم انجنیر طارق، یو شمېر آمرینو او کارکوونکو ګډون کړی وو.

محترم مولوي کلیم الله افغان په دې پروګرام کې د مسلکي پوهې د ترلاسه کولو پر اهمیت او اړتیا خبرې وکړې او زیاته یې کړه؛ چې د کارکوونکو د ظرفیتونو لوړول، د خدمتونو د کیفیت ښه ‌والي او د اداري چارو د مؤثریت او مثمریت په برخه کې بنسټیز رول لري.

د مالي او اداري چارو عمومي رئيس وويل: د دې ډول ارزښتناکو سیمینارونو په لاره اچول معیاري مدیریت ته لاره هواروي او اداري نظام له دودیز مدیریت څخه حسابده او ځواب‌ویونکي مدیریت ته اړوي. همداراز دا ډول پروګرامونه د کارکوونکو د وړتیاوو د ودې لامل ګرځي او مراجعینو ته د غوره خدمتونو د وړاندې کولو زمینه برابروي.

په دې پروګرام کې محترم مولوي محمد موسی صدیقي د سیمینار اساسي موخې تشریح کړې او د ښوونیزو پروګرامونو پر ارزښت یې خبرې وکړې، هغه یې د وزارت د اداري سیستم د پیاوړتیا لپاره یو اغېزمن ګام وباله او یادونه یې وکړه چې د کارکوونکو چارو ریاست تل د مرکزي او ولایتي کارکوونکو د ظرفیتونو د لوړولو لپاره هڅې ترسره کړي دي.

هغه د  (ASPS)مرستندویه مؤسسې له مسؤل څخه د مننې ترڅنګ، د وزارت د کارکوونکو لپاره یې د لا زیاتو پروګرامونو د پراختیا غوښتنه وکړه.

محترم مفتي عبدالاحد مسعود د نبوي (صلی‌الله‌علیه‌وسلم) احادیثو په رڼا کې د فرصتونو او امکاناتو د ارزښت په اړه اصلاحي وینا وکړه او له کارکوونکو یې وغوښتل چې خپل وخت بې ځایه ضایع نه کړي، د مهارتونو د ترلاسه کولو لپاره هڅه وکړي او له هغو فرصتونو او امکاناتو څخه چې وزارت ورته برابر کړي دي، په ښه توګه ګټه واخلي، همدارنګه نوموړي د مؤسسې له مسئولینو هم مننه او قدرداني وکړه.