د شهیدانو او معلولینو چارو وزارت د یتیمانو، کونډو او معلولینو د مرستو چمتو کولو په موخه د قمر خیریه بنسټ سره د همکارۍ هوکړه لیک لاسلیک کړ
یاد هوکړه لیک چې د شهيدانو او معلولينو چارو وزارت د بهرنېو اړیکو او پلان رئيس محترم ملا صدوخان حق شناس او د قمر خیریه بنسټ استازي محترم رياض احمد ترمنځ لاسلیک شو، د هغه پر بنسټ به (۴۶۰) تنو مستحقو یتیمانو، کونډو او معلولینو ته په زابل او پکتیا ولایتونو کې خوراکي او غیر خوراکي توکي چمتو او ووېشل شي او په دې ترتيب به، هر مستحق د (۵۰۰۰) افغانېو په ارزښت مرستې ترلاسه کړي.
د یادونې وړ ده، چې د یادې پروژې د تطبيق ټوليز لګښت دوه ميليونه او درې سوه زره (۲۳۰۰۰۰۰) افغانۍ دې چې د پلي کيدو چارې به یې د زابل او پکتیا ولایتونو د شهيدانو او معلولينو چارو ریاستونو سره په همغږۍ پر مخ يوړل شي.
