د شهیدانو او معلولینو چارو وزارت د رهبرۍ شورا غونډه جوړه شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر، ښاغلي ملا عبدالمجید اخند په مشرۍ او د یاد وزارت دمرستیالانو او د اړوندو څانګو د رئیسانو په شتون کې ترسره شوه.
دا غونډه د قرآن عظیم الشان د مبارکو آیاتونو په تلاوت سره پیل شوه.
په دې ناسته کې د شهیدانو او معلولینو وزارت د بیارغونې په ریاست کې د معلولیت لرونکو وګړو لپاره د مصنوعي غړو جوړول ، د معلولیت لرونکو وګړو او د شهیدانو د وارثینو لپاره د کتابچې او پيژندکارټونو جوړونه او همدارنګه په ولایتونو کې د شهیدانو د وارثینو د تثبیت شویو فورمو مرکز ته د لیږدولو په اړه خبرې وشوې.
د شهیدانو او معلولینو چارو وزارت سرپرست وزیر ښاغلي ملا عبدالمجید آخند په هغو ولایتونو کې چې د معلولیت لرونکو وګړو د تثبیت بهیر بشپړ شوی، د یتیمانو د ثبت بهیر د پیل په اړه خبرې وکړې او ټینګار یې وکړ، چې د شهیدانو د وارثینو د نوم لیکنې بهیر دې ژر پیل شي.
د شهیدانو او معلولینو چارو وزارت د ملاتړ او خدمتونو وړاندې کولو مرستیال ښاغلي مولوي شیخ عبدالحکیم حقاني هم د معلولیت لرونکو وګړو او د شهیدانو وارثینو ته د پیژند کارټونو او کتابچې د جوړونې په اړه خبرې وکړې او یادونه یې وکړه چې معلولیت لرونکو وګړو او یتیمانو ته پیژند کارټ او کتابچې د اسلامي امارت د سیسټم سره سم جوړ او د تثیبت پروسې څخه وروسته د شهیدانو وارثینو او معلولیت لرونکو وګړو ته ورکړل شي.
د غونډۍ په پای کې د کابل ولايت د شهيدانو او معلولينو چارو رييس ښاغلي قاري شمس الامين زهير هم د شهيدانو د وارثینو د ثبت په اړه هر اړخیز معلومات وړاندې کړه او زیاته یې کړه چې په کابل ولايت کې د شهيدانو د وارثینو د ثبت درې زره فورمې بشپړې شوې دي. چې د اوونۍ په دوه ورځو کې ( چهار شنبې او پنج شنبې) د معلولینو د نوم لیکنې او نورې پاتې ورځې د یتیمانو نوم لیکنې ته ځانګړې شوي دي.
