د شهیدانو او معلولینو چارو وزارت د رهبرۍ شورا غونډه جوړه شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر ښاغلي ملا عبدالمجید اخند په مشرۍ او د یاد وزارت د مرستیالانو په ګډون او د اړوندو ادارو رئیسانو په شتون کې ترسره شوه. یاده غونډه د قرآن عظیم الشان د څو مبارکو آیاتونو په تلاوت سره پیل شوه.
په دې غونډه کې د اسلامي امارت د شهیدانو د وارثینو او معلولیت لرونکو وګړو لپاره د بانکي حسابونو د جوړولو، او دهغوی د برښنايي پیژند پاڼو د ترلاسه کولود ولایتي ریسانو غوښتنې، د وزارت د نقلیه وسایطو لپاره د کارتونو جوړول او همدارنګه د کابل ښار د خیرخانې سیمه کې د معلولیت لرونکو وګړو په هلکه د ټاکلي پلاوي د راپور وړاندې کولو په اړه خبرې اتري وشوې.
ښاغلي ملا عبدالمجید آخند د شهیدانو او معلولینو چارو وزارت سرپرست وزیر، د ټاکلي پلاوي د راپور له اوریدو وروسته وویل، هغه کسان چې له اړتیا پرته د معلولیت لرونکو وګړو په آسایشګاه کې اوسیږي او لازم شرایط یې پوره کړي نه وي باید له آسایشګاه څخه وایستل شي او پر ځای یې مستحق کسان ځای پرځای شي.
په پای کې د شهیدانو او معلولینو چارو وزارت د بشري سرچینو رئیس ښاغلي مولوي محمد موسی صدیقي د باالمقطع کارکوونکو په اړه خبرې وکړې او ویې ویل: په نوي کال کې به باالمقطع کارکوونکي په دندو ونه ګمارل شي.
