د شهیدانو او معلولینو چارو وزارت د رهبرۍ شورا غونډه ترسره شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر، ښاغلي ملا عبدالمجید آخند په مشرى، د شهیدانو او معلولینو چارو مرستیال ښاغلي شیخ صاحب عبدالحکیم حقاني، د مالي او اداري چارو عمومي رئیس ښاغلي مولوي کلیم الله افغان او د اړوندو څانګو د رئیسانو په شتون کې ترسره شوه.
د یادې غونډې موضوعات چي د شهیدانو او معلولینو چارو وزارت د دفتر رئیس ښاغلي قاري صاحب شاه محمد دوست لخوا غونډې ته وړاندې کړل شول په هغه کې د لاوارثه یتیمانو لپاره د حرفوي زده کړو څلور میاشتنۍ روزنیز ورکشاپ د پرانیستل کیدو د نیټي په هکله خبرې اترې وشوې او پریکړه وشوه چې یاد روزنیز ورکشاپ به د روانې اونۍ د چهارشنبې په ورځ پرانیستل شي په یاد روزنیز ورکشاپ کې به لاوارثه یتیمانو ته د خیاطۍ او مبايل د ترمیم په برخه کې روزنه ورکړل شي.
همداراز د شهیدانو او معلولینو چارو وزارت ته د مراجعینو د ګڼې ګوڼې د مخنیوي په هکله هم خبرې وشوې او پریکړه وشوه تر څو د اونۍ لومړۍ درې ورځې د نارینه مراجعینو او پاتې نورې درې ورځو کې دې ښځینه مراجعین وزارت ته د خپلو چارو د مخته وړلو په موخه مراجعه وکړي.
په دې غونډه کې د مراجعینو د ځای او د چارو د تنظیم په موخه یو پلاوی هم وټاکل شو چې د یاد پلاوي په ترکیب کې د داخلي تفتیش رئیس مولوي احسان الله حقاني، د پلان او همغږۍ رئیس سید محمد عظیم آغا د اطلاعاتو او عامه اړیکو مسؤل مفتي فیصل خاموش او د اداري او خدماتو رئيس ملا عبدالرحمن فهيم شامل دي.
دغه راز د هغو یتیمو انجونو په اړه هم بحث وشو چې عمرونه یې له ۲۵ کالو پورته وي همدارنګه پریکړه وشوه د غه انجونې چې عمرونه یې له ۲۵ کالو پورته وي او واده یې نه وي کړى له دې وروسته به د حقوقو او امتیازاتو څخه نه برخمنې کیږي. همدا راز په نننۍ غونډه کې د رخصتیو ورځو د فورمونو په هکله هم خبرې اترې وشوې، په یاده غوڼده کې دهغو کارکوونکو په اړه هم خبرې وشوې چې د رسمي دندو لپاره له ولایتي ریاستونو څخه د شهیدانو او معلولینو چارو وزارت ته راځي او پریکړه وشوه چې نوموړي کارکوونکي باید له اړوندو ریاستونو څخه رسمې مکتوب راوړي او د بیرته ستنیدو پر مهال هم د شهیدانو او معلولینو چارو وزارت د بشري سرچینو ریاست څخه اړوندو ریاستونو ته رسمي مکتوبونه یوسي.
