د شهیدانو او معلولینو چارو وزارت د رهبرۍ شورا غونډه ترسره شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر، ښاغلي ملا عبدالمجید آخند په مشرۍ، د تخنیکي او مسلکي چارو مرستیال ښاغلي مولوي عبدالرزاق آخند، د شهیدانو او معلولینو چارو مرستیال ښاغلي شیخ صاحب عبدالحکیم حقاني، د مالي او اداري چارو عمومي رئیس ښاغلي مولوي کلیم الله افغان او د اړوندو څانګو د رئیسانو په شتون کې ترسره شوه.
د یادې غونډې موضوعات چي د شهیدانو او معلولینو چارو وزارت د دفتر رئیس ښاغلي قاري شاه محمد دوست لخوا غونډې ته وړاندې کړل شول، په دې غونډه کې د هغو معلولینو په هکله چې په ولایتونو او مرکز کې ځانونه د مجاهدینو په نامه ثبتوي چې ځینې یې د مجاهدینو له جملې څخه نه دي، هر اړخیزې خبرې وشوې او پریکړه وشوه چې له دې وروسته به د هغوی د ثبت او راجسټر په پروسه کې د استخباراتو ریاست لخوا د استعلام ځواب او همداراز د شهیدانو او معلولینو چارو وزارت د رسمي کارمند تأیید اړین ګڼل کیږي او پرته له یادو مواردو څخه به د هیڅ یوه تأیید او تصدیق د منلو وړ نه دې.
همداراز په یاده غونډه کې د یتیمانو، کونډو او معلولینو د میاشتنې نغدي مرستو د ورکړۍ د طرحې پر تعدیل شویو مادو باندې هم خبرې وشوې او پریکړه وشوه چې هغه مادې چې د تعدیل وړ وي په هغوی کې دې تغییر او بدلون راشي.
همدارنګه په دې غونډه کې د یتیمانو، کونډو او معلولیت لرونکو وګړو د تثبیت په پروسه کې د لا شفافیت رامنځته کولو او په ټولیزه توګه د جعل او تزویر د مخینوي او د له منځه وړلو په موخه له نن څخه وروسته د یتیمانو او معلولینو د تثبیت پروسه په مرکز او ولایتونو کې د امرثاني پورې وځنډول شوه، همدارنګه ولایتي رئیسانو ته هدایات ورکړل شو، تر څو په خپلو اړوندو ولایتونو کې بیلابیلې کمیټې وټاکي او کور په کور دې د ثبت شویو یتیمانو، کونډو او معلولینو څیړنه ترسره کړي تر څو په راتلونکي کې په یاده پروسه په هر اړخیز ډول شفافیت او روڼتیا رامنځته شي.
همداراز په پام کې ده چې په نږدې ورځو کې د شهیدانو او معلولینو چارو وزارت لخوا یو باصلاحیته پلاوی هم ځینو ولایتونو واستول شي ترڅو هلته ته د ثبت شویو یتیمانو، معلولینو د تثبیت پروسې د څرنګوالي په هکله څیړنه او بررسي وکړي او د خپلو کاري اجرااتو راپور دې د شهیدانو او معلولینو چارو وزارت له مشرتابه سره شریک کړي.
