د شهیدانو او معلولینو چارو وزارت د دعوت او ارشاد رئیس د کلیو بیارغونې او پراختیا وزارت کارکوونکو ته اصلاحي وینا وکړه
د شهیدانو او معلولینو چارو وزارت د دعوت او ارشاد رئیس محترم مفتي عبدالاحد مسعود د کلیو بیارغونې او پراختیا وزارت کارکوونکو ته په یوه اصلاحي غونډه کې د دعوت او ارشاد د اهمیت، د امیر د اطاعت پر ارزښت، د اطاعت فضیلت او د بېاطاعتۍ د زیانونو او منفي پایلو په اړه هر اړخیزه وینا وکړه.
محترم مفتي عبدالاحد مسعود دعوت او ارشاد چارو پر مخ وړل په ټولنه کې د هر وګړي یو مهم مسؤلیت وباله او ټینګار یې وکړ چې کارکوونکي باید د خپلو اداري دندو تر څنګ دیني او اخلاقي مسئولیتونو ته هم جدي پاملرنه وکړي.
د دعوت او ارشاد رئیس د قرآن عظیم الشان او نبوي صلی الله علیه وسلم د مبارکو احادیثو په رڼا کې د امیر د اطاعت پر ارزښت خبرې وکړې او اطاعت یې په ټولنه کې د نظم او یووالي مهم لامل یاد کړ.
همداراز محترم مفتي عبدالاحد مسعود د بې اطاعتۍ زیانونو او خطرناکو پایلو ته اشاره وکړه او ویې ویل، چې د امیر له اوامرو سرغړونه د نظام د کمزورۍ، بېنظمۍ د خپرېدو، د عامه باور د له منځه تلو او په ټولنه کې د فتنې د رامنځته کېدو لامل ګرځي.
