د شهیدانو او معلولینو چارو وزارت د ارزونې پلاوي د یاد وزارت د پلان او همغږۍ ریاست له کړنو هراړخیزه ارزونه وکړه
د شهیدانو او معلولینو چارو وزارت د ځانګړي پلاوي د ارزونې او پلټنې په لړ کې د پلان او همغږۍ ریاست او همداراز د تدارکاتو آمریت د کړنو او فعالیتونو ارزونه او پلټنه ترسره شوه، په دې ارزونه کې د پلان او همغږۍ ریاست ټولې برخې( د راپورونو د تحلیل او توحید آمریت، د بهرنېو اړیکو آمریت او اجرائیه مدیریت) همدارنګه د تدارکاتو آمریت ( قراردادونه، کړنلارې، کاري پلانونه او ټول کاري اسناد) په هر اړخیز ډول د ټاکل شوي پلاوي لخوا وڅیړل شول، او د یادو څانګو پر وړاندې شته ستونزې او ننګونې له یاد پلاوي سره شریک کړاې شوې او نوموړي پلاوي هم د ستونزو د حل په موخه د لازمو همکاریو ژمنه وکړه.
د ارزونې دا لړۍ څه موده وړاندې پیل شوې وه او په کې د ریاستونو د کړنو او فعالیتونو څرنګوالی، کاري پلانونو تطبیق، د وزارت د کارکوونکو اجراآت، د کارکوونکو د مسلکي مهارتونو وړتیا، او همداراز یتیمانو او معلولیت لرونکو وګړو ته د ښو او غوره خدمتونو وړاندې کولو څرنګوالی د ټاکل شوي پلاوي لخوا په هر اړخیز ډول وڅیړل شول.
د یادونې وړ ده چې د شهیدانو او معلولینو چارو وزارت د سرپرست وزیر ښاغلي ملا عبدالمجید آخند د ځانګړي هدایت پر اساس د یاد وزارت د اړوندو ریاستونو د کړنو او فعالیتونو د ارزونې او پلټنې په موخه هیئت ګمارل شوې وو، تر څو د اړوندو ریاستونو ورځنۍ کړنې او فعالیتونه وڅیړي او راپور یې د وزارت له مشرتابه سره شریک کړي.
د ارزونې او پلټنې د پلاوي په ترکیب کې د بشري سرچینو رئیس ښاغلې مولوي محمد موسی صدیقي او د څارنې او ارزونې ریاست غړی ښاغلې مولوي خیرالله خیرخواه شامل دي چې مشري یې د شهیدانو او معلولینو چارو وزارت مشاور ښاغلی مولوي حیات الله میوند کوي.
