د شهيدانو او معلولینو چارو سرپرست وزير محترم الحاج ملا عبدالمجید آخند ميدان وردګو ولایت ته سفر وکړ
د شهیدانو او معلولینو چارو وزارت سرپرست وزير محترم الحاج ملا عبدالمجید آخند میدان وردګو ولایت ته د سفر په ترڅ کې د یاد وزارت اړوند ریاست د کاري بهير څخه ليدنه وکړه او یتیمانو، کونډو او معلولینو ته يې د لا ښو او پر وخت خدمتونو وړاندې کولو په موخه، د یاد ریاست مسؤلینو ته لازمې سپارښتنې او لارښوونې وکړې.
همدا راز محترم وزير صاحب د یو پروګرام په ترڅ کې چې میدان وردګو ولایت د والي مرستيال محترم حافظ سید الرحمن او دکليو او پراختیا رئيس محترم الحاج مولوي وحید الله راشد حضور درلود له دریو (۳) تنو مجاهدینو سره چې سترګې یې په جهاد کې نابینا شوې وې، له هر یو سره یې یولک او پنځوس زره (۱۵۰۰۰۰) افغانۍ نغدي مرسته ترسره کړه.
د یادونې وړ ده چې تر دې وړاندې د شهيدانو او معلولینو چارو سرپرست وزير محترم الحاج ملا عبدالمجید آخند هلمند، ارزګان او زابل ولایتونو ته سفر کړی وو او د یادو ولایتونو د شهيدانو او معلولینو چارو رياستونو د کړنو او فعاليتونو څرنګوالی ارزولی او د غوره خدمتونو وړاندې کولو په موخه یې د یادو رياستونو مسؤلینو ته لازمې لارښوونې کړي دي.
