د شهيدانو او معلولينو په چارو کې د دولت وزارت مشرتابه هلمندی زده کوونکی صبغت الله وستايه
د شهيدانو او معلولينو په چارو کې د دولت وزارت مشرتابه هلمندی زده کوونکی صبغت الله وستايه
د شهیدانو او معلولینو په چارو کې د دولت وزیر ښاغلي لعل الدین آریوبي هلمندی ماشوم، چې کمبودیا کې یې د څلوېښتو هېوادونو تر منځ د ریاضي نړیواله سیالۍ کې لومړی مقام ګټلی و وستایه.
ښاغلي آریوبي صبغت الله او د هغه کورنۍ ته د دغه ستر ویاړ مبارکي وویله او هغه ته یې د پښتون ژغورنې غورځنګ د مشر منظور پښتین د مبارزې سمبول سره مزارۍ خولۍ، د اعزاز لونګۍ، چپنه، ستاینلیک او IPAD ډالۍ کړل.
ښاغلي آریوبي زیاته کړه، هلمند یو جګړه ځپلی ولایت دی، د زده کړو فرصتونه پکې کم ليدل کېږي او د هلمند د نوم په اورېدو د خلکو په ذهن کې یوازې د جګړې تود ډګر انځوېږي؛ خو له نیکه مرغه کوچني صبغت الله خان د خپلې خارق العاده وړتیا پر اساس د هلمند په اړه ټول ناسم روایتونه بدل کړل او دا یې وښوده، چې د جګړې د اور په لمبو کې د سوځیدونکي هلمند غېږه داسې استعدادونه هم لري، چې د ریاضي په نړیواله سیالۍ کې د ۴۰ هېوادونو تر منځ لومړی مقام ګټلی شي.
ښاغلي آریوبي څرګنده کړه، چې صبغت الله ستره کارنامه کړې. په لویه کچه باید وستایل شي، تر څو نورو کوچنیانو ته د خپل استعداد د غوړېدا او پرمختګ انګیزه ورکړي.
