د بامیان ولایت د شهیدانو او معلولینو چارو په ریاست کې د کاري بهیر د لا ښه والي په موخه اداري غونډه ترسره شوه
د بامیان ولایت د شهیدانو او معلولینو چارو رئیس محترم علي خان احمدي په مشرۍ په یاد ریاست کې اداري غونډه ترسره شوه، په یاده غونډه کې د اړوندو څانګو ټولو کارکوونکو ګډون کړی وو.
په دې غونډه کې محترم علي خان احمدي یتیمانو، کونډو او معلولینو ته د لا ښو خدمتونو وړاندې کولو پر څرنګوالي، په چارو کې د سلسلې مراتب مراعاتولو، د کاري پلان او د دندو لایحو سره سم د سپارل شويو مسؤلیتونو د ترسره کولو او د نورو په چارو کې د بې ځایه مداخلې څخه د مخنیوي په هکله هر اړخیزې خبرې وکړې.
همداراز د دې غونډې په ترڅ کې د یتیمانو، کونډو او معلولینو د سروې بهیر د پېل کولو څرنګوالی وڅېړل شو او په پای کې د اړوندو برخو کارکوونکو نظرونو او وړاندیزونه هم واوریدل شول.
