د شهیدانو او معلولینو چارو وزارت د مالي او اداري چارو عمومي رئيس د یو شمېر بانکونو له استازو سره وکتل
د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان په خپل کاري دفتر کې، یتیمانو، کونډو او معلولینو ته د بانکي خدمتونو په برخه کې د لازمو اسانتیاوو رامنځته کولو په موخه، د افغانستان بانک، ملي بانک، میوند بانک او عزیزي بانک له استازو سره وکتل، د دې لیدنې پر مهال د مالي او حسابي چارو رئيس محترم مولوي محمد امین دروېش، د معلولینو چارو رئيس محترم مولوي شاه ولي، د شهیدانو چارو رئيس محترم مولوي روح الله نصرت او د اطلاعاتو او عامه اړیکو رئیس محترم مفتي فیصل خاموش هم حضور درلود.
په پیل کې محترم مولوي کلیم الله افغان د یادو بانکونو استازو ته ښه راغلاست وویل، د یتیمانو، کونډو او معلولینو د میاشتنيو نغدي مساعدتونو د ورکړې په برخه کې د هغوی هڅې وستایلې او په یاده برخه کې شته ستونزې او ننګونې هم د بانکونو له استازو سره شریکې کړې.
محترم مولوي کلیم الله افغان د بانکونو له استازو وغوښتل چې د یتیمانو، کونډو او معلولینو تلیفونو ته، د میاشتنیو نغدي مرستو د حواله کیدو پر وخت د خبرتیا پیغامونو د لېږلو اسانتیاوې برابرې کړي، تر څو یاد مستحقین د پیسو د حواله کېدو پر وخت خبر شي، دا کار به د هغوی له سرګردانۍ او بانکونو ته د پرله پسې تګ راتګ مخه ونیسي.
په ورته وخت کې، د یادو بانکونو استازو هم یتیمانو، کونډو او معلولینو لپاره د اړینو اسانتیاوو د برابرولو او د پیسو د لېږد او حوالې په اړه د خبرتیا پیغامونو د فعالولو په برخه کې د هر اړخیزې همکارۍ ډاډ ورکړ.
