په پکتیکا ولایت کې د شهیدانو او معلولینو پر (۶۰۰) مستحقو کورنيو باندې مرستې ووېشل شوې
د پکتیکا ولایت د شهیدانو او معلولینو چارو ریاست د یتیمانو، کونډو او معلولینو د ملاتړ او لاسنیوي په موخه د یوې خیریه مؤسسې سره په همغږۍ د یاد ولایت اړوند د مرکز او ولسوالیو د شهیدانو او معلولینو پر (۶۰۰) مستحقو کورنيو باندې مرستې چې په هغه کې اوړه، وریجې، غوړي او نور خوراکي مواد شامل وو، په منظم او شفاف ډول ووېشل.
د مرستو د وېش پر مهال د پکتیکا ولایت د شهیدانو او معلولینو چارو رئیس محترم مولوي محمد حنيف سيف الخالد د یادې خیریه مؤسسې له کړیو مرستو څخه مننه وکړه او له نورو خیریه بنسټونو او مرستندویه مؤسساتو یې هم وغوښتل چې د مرستو په وېشلو کې د شهیدانو او معلولینو کورنيو ته لومړیتوب ورکړي ترڅو په سمه توګه د هغوی ستونزو ته رسیدګي وشي.
