د شهیدانو او معلولینو چارو وزارت مرستیال محترم شیخ صاحب عبدالحکیم حقاني خوست ولایت ته یې د سفر په ترڅ کې د شهیدانو ورثه ؤ او یتیمانو سره له نږدې وکتل او هغوی ته یې ډاډ وکړ چې ستونزو ته یې به پر وخت رسیدګي وشي.
په هغه غونډه کې چې د خوست ولایت مقام د غونډو په عمومي تالار کې جوړه شوې وه، په هغه کې د شهیدانو او معلولینو چارو وزارت مرستیال محترم شیخ صاحب عبدالحکیم حقاني، د دې ولایت والي محترم مولوي عبدالقیوم روحاني، د خوست ولایت د شهیدانو او معلولینو چارو رئیس محترم مولوي عبدالرحیم احسان، د پکتیا ولایت د شهیدانو او معلولینو چارو رئیس محترم مولوي محمد نبي او ځینو نورو مسؤلینو او همداراز یتیمانو حضور درلود.
په دې غونډه کې د شهیدانو او معلولینو چارو وزارت مرستیال محترم شیخ صاحب عبدالحکیم حقاني د شهیدانو ورثه ؤ او معلولینو ته د خدمتونو وړاندې کول او وخت پر وخت د هغوی پوښتنه او ستونزو ته یې په بشپړه توګه رسیدګي د اسلامي امارت له مسؤلیتونو څخه وبلل او زیاته یې کړه: د شهیدانو او معلولینو چارو وزارت په خوست ولایت کې د روان کال په تېرو شپږو میاشتو کې (۱۷۵) میلیونه افغانۍ د شهیدانو ورثه ؤ او معلولینو ته د میاشتنې نغدي مرستو په توګه وېشلي دي او د دې وزارت رهبرۍ هڅه کوي چې د دوې لپاره د ژوند په ټولو برخو کې لازمې اسانتیاوې رامنځته کړي او هر وخت د شهیدانو او معلولینو چارو وزارت او د اړوند ریاستونو دروازې د هغوی پر مخ خلاصې وي.
محترم شیخ صاحب همداراز د شهیدانو ورثه ؤ له وکیلانو څخه وغوښتل تر څو د یتیمانو د پالنې او روزنې په برخه کې پوره پاملرنه ولري او هغه میاشتنۍ نغدي مساعدتونه چې د هغوی لپاره ځانګړي شوي هغه په پوره امانتدارۍ ورته ورسوي.
