معلوليت يوه نړيواله پديده ده او ټول دولتي او خصوصي بنسټونه يې پر وړاندې خدماتي مسووليت لري
معلوليت يوه نړيواله پديده ده او ټول دولتي او خصوصي بنسټونه يې پر وړاندې خدماتي مسووليت لري
نن د ليندۍ په ۵مه، د شهيدانو او معلولينو په چارو کې د دولت وزارت په مشرۍ، د معلوليت لرونکو وګړو لپاره د غوره خدمتونو ترسراوي په موخه نږدې د (۳۵) دولتي ادارو ترمنځ د همغږۍ ناسته ترسره شوه.
د ناستې په پيل کې د شهيدانو او معلولينو په چارو کې د دولت وزارت د برنامو او همغږۍ مرستيالې صبرۍ اندړ، له نږدې (۳۵) دولتي ادارو څخه راغلو استازو ته ښه راغلاست ووايه او د معلوليت لرونکو وګړو او شهيدانو ورثې ستونزو ته د رسيدنې لپاره يې د وزارتونو ترمنځ د زياتې همغږۍ غوښتنه وکړه.
آغلې اندړ زياته کړه، چې معلوليت يوه نړيواله پديده ده او ټول دولتي او خصوصي بنسټونه يې پر وړاندې خداماتي مسووليت لري.
د شهيدانو او معلولينو په چارو کې د دولت وزارت د پلان او پاليسۍ رئيس محمد اقبال قيام، د پرزينټيشن په بڼه له ګډونوالو سره د ياد وزارت د معلولينو لپاره د تېرو کلونو کاري راپور شريک کړ او د راتلونکي کال لپاره يې له ټولو وزارتونو وغوښتل چې، له دوی سره په همغږۍ بايد معلوليت لرونکو وګړو ته په خپلو کاري پلانونو کې ځانګړی ځای ورکړي.
له وزارتونو راغلو استازو په نوبت د معلولينو د ژوند د ښه والي په پار، خپل وړانديزونه او پلانونه د وزارت له مشرتابه هئيت سره شريک کړل او ټينګار يې وکړ، چې د معلوليت لرونکو وګړو لپاره به هره اداره په اړوند کاري ساحه کې د هغوی د معشيت، زده کړو، روغتيا، بيارغونې، کارموندنې او د ژوند په نورو برخو کې خپل مسوليت په سمه بڼه ادا کوي او په پای کې هوکړه وشوه چې په دې اړوند ترسره شويو خدمتونو راپور به، د شهيدانو او معلولينو په چارو کې د دولت وزارت سره شريکوي.
