په کندهار ولایت کې د یو شمېر فدایانو او مجردو شهیدانو کورنیو سره نغدي مرسته ترسره شوه
د کندهار ولایت د شهیدانو او معلولینو چارو رئیس محترم حاجي ملا عبدالقاهر فیروز د درې کسیز پلاوي په ملتیا د شهیدانو کورنیو لپاره د نغدي مرستو د وېش په موخه کښته میوند، ژیړې او پنجوايي ولسوالیو ته رسمي سفر ترسره کړ.
په دې سفر کې نوموړي د (۳۹۶) مجردو شهیدانو کورنیو او د (۱۷) فدایانو کورنیو سره له نږدې وکتل، د هغوی ستونزې او اړتیاوې یې واورېدې او له هغوی سره یې یو اندازه نغدي مرستې هم ترسره کړې.
د کندهار ولایت د شهیدانو او معلولینو چارو رئیس یتیمانو، کونډو او معلولیت لرونکو وګړو ته د خدمتونو د وړاندې کولو له بهیر څخه هم لیدنه وکړه، د غوره او اغېزمنو خدمتونو د وړاندې کولو په موخه یې اړوندو کارکوونکو ته لازمې لارښوونې وکړې.
همداراز نوموړي د کښته میوند ولسوالۍ له ولسوال سره لیدنه ترسره کړه او له هغه څخه یې د یتیمانو، کونډو او معلولینو لپاره د خدمتونو د لا ښه ترسره کولو په برخه کې د زیاتو همکاریو غوښتنه وکړه.
