په کندز ولایت کې (۸۰۰) تنو مستحقو کسانو مرستې ترلاسه کړې
د کندز ولایت د شهيدانو او معلولينو چارو رياست د یوې خیریه مؤسسې سره په همغږۍ په (۸۰۰) تنو مستحقو یتیمانو، کونډو او معلولینو باندې خوراکي توکي ووېشل، په یادو توکو کې اوړه، غوړي، وریجې او ځینې نور خوراکي مواد شامل وو.
دغه مرستې د کندز ولایت د شهیدانو او معلولینو چارو رئیس محترم مولوي نقیب الله سنان او د خیریه مؤسسې مسؤلینو په شتون کې مستحقو کسانو ته په شفاف او عادلانه ډول ورکړل شوې.
په ورته وخت کې مرسته اخیستونکو هم د شهیدانو او معلولینو چارو ریاست له ځانګړې پاملرنې څخه د مننې ترڅنګ، په راتلونکي کې د ورته مرستو غوښتنه وکړه.
