په میدان وردګ ولایت کې د (۱۵۰) تنو مستحقو کسانو سره د خوراکي توکو مرسته ترسره شوه
د میدان وردګ ولایت په جلریز ولسوالۍ کې د آلماني سیلانیانو له لوري د (۱۵۰) تنو یتیمانو، کونډو او معلولینو سره د خوراکي توکو مرسته ترسره شوه او هر مستحق د (۵۰۰۰) افغانیو په ارزښت خوراکي توکي ترلاسه کړل.
یادو آلماني سیلانیانو د میدان وردګ ولایت د شهیدانو او معلولینو چارو رئیس محترم مولوي محمد نذیر ابومحمد سره هم لیدنه وکړه. په دې لیدنه کې، آلماني سیلانیانو د اسلامي امارت د مسؤلینو نیک چلند او د افغان ولس میلمه پالنه وستایله، هغوی په هېواد کې د سولې او امنیت له ټینګښت څخه خوښي څرګنده کړه او دا یې د افغانانو لپاره چې کلونه د جګړو له امله ځورېدلي او قرباني شوي وو، د خوښۍ او خوشحالۍ ځای وباله.
همداراز یادو سیلانیانو د شهیدانو او معلولینو چارو وزارت له لوري د یتیمانو، کونډو او معلولینو لپاره د نغدي مرستو د وېش له پروسې هم ستاینه وکړه او هغه یې د یوه مثبت ګام په توګه یاد کړه.
