لوړو زده کړو ته د معلولیت لرونکو وګړو د لارموندنې زمینه برابرول مهم ګام دی
لوړو زده کړو ته د معلولیت لرونکو وګړو د لارموندنې زمینه برابرول مهم ګام دی
د شهیدانو او معلولینو چارو وزارت د برنامو او همغږۍ مرستیالې صبري اندړ او د معلولینو د څېړنیز انستیتوت رییس دریا خان بهیر د (AHEAD) موسسې مسولینو سره وکتل او معلولیت لرونکو وګړو ته د زده کړو او ښوونیزو برنامو چمتو کولو په اړه یې خبرې وکړې.
د یادې موسسې مسولینو نایله ناصري او نجیب الله الکوزي وویل: موخه یې هغو معلولیت لرونکو وګړو ته، چې د ښوونځي د وروستیو کلونو زده کوونکي دي او غواړي لوړو زده کړو ته لار ومومي، د لنډمهالو کورسونو او کانکور ازموینې ته د چمتووالي برخو کې مرسته او همکاري کول دي. د (AHEAD) موسسې مسولینو زیاته کړه، چې په یاده برخه کې د خدمتونو له وړاندې کولو مخکې د هېواد د پینځو ولایتونو (کابل، ننګرهار، هرات، مزار شریف او کندهار) ښوونځیو کې څېړنه کوي، تر څو ټول ښځینه او نارینه معلولین تشخیص او پر بنسټ یې ورته د زده کړو او روزنې زمینه برابره کړي.
د برنامو او همغږۍ مرستیالې صبري اندړ د یادې موسسې پروژه او پلان اغېزناک وګڼه او د هرکلي تر څنګ یې د هر اړخیزې همکارۍ او مشترک کار ډاډ ورکړ. د دې تر څنګ یې د وزارت د معلولینو څېړنیز انستیتوت رییس ښاغلي دریاخان بهیر ته لارښوونه وکړه، چې د معلولینو د ستونزو، غوښتنو او اړوتیاوو د تشخیص پر بنسټ د څېړنې موضوعات د موسسې مسولینو ته وسپاري، تر څو یې د دوی له لوري څېړنه پیل او د پروژې په تطبیق سره محسوسې پایلې ترلاسه شي.
