د کابل ښار په (۳) ناحیو کې د لسو یتیمانو کورنیو لپاره د استوګنې کورونو د جوړولو چارې بشپړې شوې
د شهیدانو او معلولینو چارو وزارت د (HHRD) خیریه مؤسسې په مالي ملاتړ د لسو مستحقو یتیمانو د کورنیو لپاره د کابل ښار په (۸) (۹) او (۱۲) ناحیو کې د استوګنې کورونو د جوړولو چارې بشپړې کړې چې نن د مراسمو په ترڅ کې کورونه مستحقو کورنیو ته وسپارل شول.
د یادو کورونو د پرانيستلو په مراسمو کې د شهیدانو چارو رئیس محترم مولوي روح الله نصرت، د (HHRD) نړیوالې مؤسسې رئیس محترم قاري عبیدالله فیصل، د پروژو څخه د څارنې او ارزونې آمر محترم ملا مطیع الله ابوالمختار، د شهیدانو چارو ریاست د محاسبې آمر محترم مولوي خیر الله خیرخواه، د نشراتو آمر محترم حافظ محمد یعقوب روښان، د ټولنیزو خدمتونو د تنظیم ریاست استازو او د کابل ولایت د اقتصاد ریاست استازي هم شتون درلود.
په دې پروګرام کې محترم مولوي خیر الله خیرخواه د قرآن عظیمالشان د مبارکو آیتونو او د نبوي صلی الله علیه و سلم احادیثو په رڼا کې د یتیمانو د حقوقو په اړه هر اړخیزې خبرې وکړې، د (HHRD) خیریه مؤسسې له مسؤلینو څخه یې د هغوی د دوامدارو همکاریو په پار مننه وکړه.
د یادونې وړ ده چې یاد کورونه دوه خونې، یو پخلنځی، یو تشناب او يو دهلېز لري او په بنسټیز او معیاري ډول جوړ شوي دي.
