د هېواد په کچه د معلولیت لرونکو وګړو د کره شمېر په اړه عمومي سروې ترسره کېږي
د هېواد په کچه د معلولیت لرونکو وګړو د کره شمېر په اړه عمومي سروې ترسره کېږي
د شهیدانو او معلولینو په چارو کې د دولت وزیر لعل الدین آریوبي د مرکزي احصایې او معلوماتو ملي ادارې مرستیال حسیب الله موحد او مل پلاوي سره وکتل او د هېواد په کچه د معلولیت د مختلفو کټګوریو پر بنسټ د معلولیت لرونکو وګړو د کره شمېر د ټاکلو په اړه یې د همغږۍ ناسته وکړه.
ښاغلي آریوبي وویل، چې د جمهور رییس د لارښوونې پر بنسټ به د هېواد په کچه د معلولیت لرونکو وګړو د دقیقو ارقامو په اړه عمومي سروې ترسره او په دې برخه کې به له دولتي سرچینو ګټه واخیستل شي. زیاته یې کړه، چې په دې اړه د مرکزي احصایې او د معلوماتو ملي ادارې همکاري او همغږۍ اړینه ده.
د مرکزي احصایې او معلوماتو ملي ادارې مرستیال ښاغلي موحد د معلولیت په مختلفو برخو کې د دقیقو ارقامو د ټاکلو د عمومي سروې موضوع مهمه وګڼله وویل، چې په دې اړه به د دواړو ادارو تر منځ کډه کاري کمېټه رامنځته او د منل شویو معیارونو پر بنسټ به سروې ترسره کړي، تر څو د معلولیت عمومي ارقام او سلنه ترلاسه او د معلولیت په ملي ستراتېژۍ کې ځای پر ځای شي.
دواړو خواوو په مشترک کار، هر اړخیزې همغږۍ او همکارۍ او په معیاري ډول د سروې ترسره کولو باندې تاکید وکړ او پرېکړه وشوه، چې عملي چارې یې ژر تر ژره پیل شي.
د یادې سروې د ترسره کېدو موخه د هېواد د معلولیت لرونکو وګړو د کره شمېرې او سلنې ټاکل او په دې برخه کې د ضد او نقیضو شمېرو او معلوماتو مخنیوی دی.
