د نيمروز ولايت د شهيدانو او معلولينو چارو آمريت د شهيد اوونۍ ونمانځله
د نيمروز ولايت د شهيدانو او معلولينو چارو آمريت د شهيد اوونۍ ونمانځله
د نيمروز ولايت د شهيدانو او معلولينو چارو آمريت د محترم والي صيب، د ولايتي شورا غړو، ديني عالمانو، فرهنګيانو، مدني فعالانو، د شهيدانو وارثانو او د معلوليت لرونکو وګړو په شتون کې د شهيد اوونۍ نمانځنه وکړه.
ياد مراسم پرون چارشنبه د وږې په ۱۹مه، دائر شوي و.
د مراسمو په پيل کې د نيمروز د شهيدانو او معلولينو چارو آمر لخوا د شهيدانو او معلولينو په چارو کې د دولت وزير، جلالتماب لعل الدين آريوبي د شهيد اوونۍ په وياړ ور لېږلی پيغام ولوست. د ښاغلي وزير صيب په پيغام کې د شهيدانو د قربانيو او سرښندنو يادونې او ستاينې ترڅنګ خپلو ولايتي آمرينو ته د شهيدانو وارثانو ته د حقونو او امتيازاتو د پر وخت رسېدنې او د غوره خدمتونو وړاندې کولو سپارښتنې پکې شوې وې.
له هغې وروسته د نيمروز محترم والي دوکتور سيد ولی د شهيدانو د وياړونو په ساتلو او راتلونکو نسلونو ته د هغوی د باغيرته او باجراته کارنامو پر ښودنو او بيانولو ټينګار وکړ. نوموړي ژمنه وکړه چې د نيمروز سيمه ييزه حکومتوالي به د شهيدانو د کورنيو غړو د ژوند هر اړخيزو ستونزو د حل لپاره شپه ورځ کار وکړي، تر څو ددې ځوریدلي او کړيدلي قشر پر پرهرونو د زخم پټۍ کېښودل شي.
د مراسمو نورو ويناوالو هم د شهيدانو د پاکو روحونو، وينو او سرښندنو ته د درناوي په تړاو خبرې وکړې او غونډه د شهيدانو سپيڅلو روحونو د خوښ ساتلو او ارامتيا په پار، د دوعا لاسونو په پورته کولو سره پای ته ورسېده.
