د شهیدانو وارثینو سره د نغدي مرستې په موخه د همکارۍ هوکړه لیک لاسلیک شو
د شهیدانو وارثینو سره د نغدي مرستې په موخه د همکارۍ هوکړه لیک لاسلیک شو
د شهیدانو او معلولینو په چارو کې د دولت وزارت او د (FRDO) موسسې تر منځ د همکارۍ هوکړه لیک نن (د تلې ۲۹) د دې وزارت د غازي آمان الله خان د غونډو په تالار کې لاسلیک شو.
دا هوکړه لیک د شهیدانو او معلولینو په چارو کې د دولت وزارت د پلان او پالیسۍ رییس ښاغلي ذبیح الله اسحاقزي او د یادې موسسې د مسولې آغلې شریفې همراه له لوري په داسې حال کې لاسلیک شو، چې د دواړو بنسټونو استازو هم ګډون درلود.
ښاغلي اسحاقزي خوښي وښوده، چې د شهیدانو وارثینو د خدمت او ملاتړ په موخه یو بل ګټور ګام پورته کوي او د(ایف آر ډي آو) موسسې سره د همکارۍ یو بل هوکړه لیک لاسلیکوي. نوموړي د یادې موسسې استازو ته له نورو دولتي او غیر دولتي بنسټونو سره د معلولیت لرونکو وګړو او د شهیدانو وارثینو په برخه کې د دې وزارت له لوري د لاسلیک شویو هوکړه لیکونو په اړه هر اړخیز معلومات وړاندې کړه.
د ایف آر ډي او موسسې مسولې آغلې شریفې همراه د هوکړه لیک پر څرنګوالي او د دوی د موسسې له خوا د شهیدانو وارثینو ته د نغدي مرستو د وېش پر مېکانېزم خبرې وکړې.
د یادونې وړ ده، چې یاده موسسه دا مرستې د خوړو نړیوال سازمان (WFP) په همکارۍ تر راتلونکو دریو میاشتو پورې ترسره کوي.
