د شهیدانو او معلولینو چارو په وزارت کې د پلټنې عالي ادارې له مفتشینو سره غونډه ترسره شوه
د شهیدانو او معلولینو چارو وزارت د مالي او اداري چارو عمومي رئیس محترم مولوي کلیمالله افغان په مشرۍ د پلټنې عالي ادارې له مفتشینو سره غونډه ترسره شوه. د دې غونډې پر مهال د کارکوونکو د چارو رئیس محترم مولوي محمد موسی صديقي، د استخدام آمر محترم مولوي عبدالصمد حماد او د سوانحو او ارزونې آمر محترم کریم الله فاروقي هم حضور درلود.
په دې غونډه کې د بالمقطع او (NTA) کارکوونکو د استخدام د شرایطو په هکله هر اړخیزې خبرې وشوې تر څو د یادو کارکوونکو د استخدام د پروسې چارې په منظم او قانوني ډول پر مخ یوړل شي.
محترم مولوي کلیم الله افغان په چارو کې د شفافیت رامنځته کولو، د اصلاحاتو په راوستلو، د غلطیو او فساد په مخنیوي کې د تفتيش او پلټنې پروسه خورا مهمه وبلله او د یادې ادارې مفتشینو ته یې د پوره همکارۍ ډاډ ورکړ ترڅو د تفتیش پروسه په شفافه او مؤثره توګه ترسره شي.
همداراز په دې غونډه کې محترم مولوي محمد موسی صدیقي په قانوني او منظم ډول د کارکوونکو د استخدام د پروسې د پرمخ وړلو په اړه ډاډ ورکړ او ویې ویل: له نېکه مرغه د شهیدانو او معلولینو وزارت ټولې کړنې او اجراآت د قوانینو سره سم ترسره شوې دي او په دې کې هیڅ ډول سهل انگاري او غفلت نه دی شوی.
