د شهیدانو او معلولینو چارو وزارت مرستیال محترم شیخ صاحب عبدالحکیم حقاني د کار او ټولنیزو چارو وزارت له مرستیال سره وکتل
د شهیدانو او معلولینو چارو وزارت مرستیال محترم شیخ صاحب عبدالحکیم حقاني په خپل کاري دفتر کې د کار او ټولنیزو چارو وزارت له مرستیال محترم مولوي محمد زاهد او راغلي پلاوي سره لیدنه وکړه، د دې لیدنې پر مهال د پلان، بهرنیو اړیکو او تقنین چارو رئیس محترم مولوي ثناء الله فرقاني، د معلولینو چارو رئیس محترم مولوي شاه ولي مسافر، د ټولنیزو خدمتونو د تنظیم رئیس محترم مولوي علاؤ الدین سعد او د اطلاعاتو او عامه اړیکو رئیس محترم مفتي فیصل خاموش حضور درلود.
په دې لیدنه کې د عالیقدر امیرالمؤمنین حفظه الله تعالی د هغه حکم د تطبیق په اړه خبرې وشوې، چې له مخې یې په مرکز او ولایتونو کې پر شرایطو برابر معلولینو لپاره د فني او حرفوي زده کړو پروګرامونو د عملي کولو لارښوونې شوې دي.
په دې ليدنه کې محترم شیخ صاحب عبدالحکیم حقاني د معلولینو لپاره د مسلکي پروګرامونو د پيل کولو پر څرنګوالي خبرې وکړې او د یادو پروګرامونو د مؤثر تطبیق پر اهمیت یې ټینګار وکړ. نوموړي همداراز ډاډ ورکړ چې د شهیدانو او معلولینو چارو وزارت به د دغو پروګرامونو د تطبیق، د معلولیت لرونکو کسانو د پېژندنې او دې وزارت پورې د اړوندو چارو د پرمخ وړلو په برخه کې له اړوندو ادارو سره هر اړخیزه همکاري وکړي.
همداراز پرېکړه وشوه چې د شهیدانو او معلولینو چارو وزارت، د کار او ټولنیزو چارو وزارت او د ملي دفاع وزارت له استازو څخه ګډ پلاوی جوړ شي، تر څو تخنیکي او د همغږۍ غونډې ترسره کړي او د فني او حرفوي پروګرامونو د پیل، تنظیم او تطبیق په اړه لازمې پرېکړې وکړي. د دې اقدام موخه دا ده چې د اړوندو وزارتونو دندې، صلاحیتونه او مسؤلیتونه په واضح ډول مشخص شي او د پروګرامونو تطبیق په منظم او بشپړۍ همغږۍ سره ترسره شي.
د یادونې وړ ده چې د فني او حرفوي پروګرامونو تطبیق د معلولینو په اقتصادي پیاوړتیا کې مهم رول لوبوي او د هغوی لپاره به د ځان بسیاینې زمینه برابره کړي.
