د شهیدانو او معلولینو چارو وزارت د کارکوونکو چارو په ریاست کې اداري غونډه ترسره شوه
د شهیدانو او معلولینو چارو وزارت د کارکوونکو چارو رئیس محترم مولوي محمد موسی صدیقي په مشرۍ په یاد ریاست کې د کاري بهیر د لا ښه والي په موخه اداري غونډه ترسره شوه چې په هغه کې د ریاست اړوند آمرینو او کارکوونکو ګډون کړی وو.
په دې غونډه کې د کارکوونکو د چارو ریاست د فعالیتونو او اجراآتو د انسجام او ښه والي په موخه د یوه جامع طرزالعمل د ترتیبولو په هکله خبرې وشوې او ټینګار وشو چې د دې ډول طرزالعمل ترتیبول کولای شي د کارکوونکو فعالیتونه په منظم او مؤثر ډول رهبري کړي او د سپارل شوو دندو د لا ښه ترسره کولو زمینه برابره کړي.
همداراز د کمپیوټر او انګلیسي ژبې د روزنیزو پروګرامونو فارغانو ته د تصدیق پاڼو د وېش، د بالمقطع کارکوونکو اړوند اسنادو د بشپړولو او د هغو بستونو لپاره چې عنوانونه یې بدل شوي، د دندو د لایحو ترتیبولو په اړه هم بحث وشو، د دې ترڅنګ، د مالیې محترم وزارت د لارښود پر اساس د (NTA) کارکوونکو د ګمارنې پروسې بشپړولو او د فتحې نه مخکې د مجاهدینو د خدمت مودې د فورمو تنظیمولو او د مؤظفې کمېټې څخه د تأیید د اخیستلو په هکله هم خبرې وشوې.
د غونډې په پای کې اړوندو کارکوونکو ته لارښوونه وشوه چې ټول یاد شوي موارد باید په دقت او لازمې همغږۍ سره تعقیب کړي.
