د شهیدانو او معلولینو چارو محترم وزیر الحاج ملا عبدالمجید آخند لوګر ولایت ته سفر وکړ
د شهیدانو او معلولینو چارو وزیر محترم الحاج ملا عبدالمجید آخند چې د دې وزارت د خاصو شهیدانو آمر محترم مولوي محمد، د ټولنیزو خدمتونو د تنظیم ریاست آمر محترم ملا ابراهیم شاه خلیل او د پراختیایي پروژو مالي مسؤل محترم حافظ شبیر احمد یې ملتیا کوله، د لوګر ولایت د مرکز اړوند د پادخواب شانه کلی د هغې مجاهدې کورنۍ لیدنې او پوښتنې ته ورغی چې د تېر شل کلن جهاد او اشغال پر ضد مبارزه کې یې درې تنه ځوانان د شهادت لوړ مقام ته رسېدلي وو.
د یادې کورنۍ مشر محمد حبیب اکا نومېږي، چې د اشغال پر وړاندې د جهاد په لاره کې یې درې تنه زامن شهیدان شوي دي. محترم وزیر صاحب د نوموړي او د هغه د کورنۍ له غړو سره خپله ژوره خواخوږي او همدردي څرګنده کړه، د شهیدانو سپېڅلو ارواحو ته یې دعا وکړه او د یادې کورنۍ د ملاتړ او لاسنیوي په موخه یې یوه اندازه نغدي مرسته ترسره کړه.
همداراز محترم وزیر صاحب د شهیدانو د قربانیو ستاینه وکړه او ویې ویل چې په هېواد کې د اسلامي نظام حاکمیت، سرتاسري امنیت، سوکالي او د خلکو د سر، مال، پت او عزت خونديتوب د شهیدانو د پاکو وینو او سپېڅلو قربانیو برکت دی، د اسلامي نظام د ټینګښت او د هېواد د آزادۍ لپاره د شهیدانو قربانۍ به تل د قدر او درناوي وړ وي او د هغوی یاد به د ولس په زړونو کې ژوندی پاتې وي.
په ورته وخت کې د یادې کورنۍ سرپرست، محترم وزیر صاحب ته ښه راغلاست وویل او څرګنده یې کړه چې دا د ویاړ او خوښۍ ځای دی چې د شهیدانو او معلولینو چارو محترم وزیر صاحب وخت په وخت د شهیدانو د کورنیو احوال اخلي، له هغوی سره له نږدې لیدنې کوي او د اړتیاوو د پوره کولو په موخه ورسره مرستې ترسره کوي، هغه د اسلامي نظام د دوام، ثبات او لا پیاوړتیا لپاره دعا وکړه.
