د شهيدانو او معلولينو چارو وزارت اړوند د دوو رياستونو لپاره ډېټابېسونه ډیزاین او ګټې اخیستنې ته وسپارل شول
په چارو کې د اسانتیاوو رامنځته کولو او د اسنادونو د لا ښه خونديتوب په موخه د شهيدانو او معلولينو چارو وزارت د ډېټابېس او معلوماتو د سیسټم ریاست له لوري د دې وزارت اړوند د دفتر ریاست او د اداري خدمتونو رياست لپاره ځانګړي ډېټابېسونه ډيزاين او ګټې اخيستنې ته وسپارل شو.
د یادو ریاستونو لپاره ډیزاین شوي ډېټابېسونه به، د خدمتونو وړاندې کولو پر کیفیت، مؤثريت او د ورځنیو چارو د پرمختګ او چټکتيا سبب وګرځي، همداراز د معلوماتو په خوندي ساتلو، منظم والي او د اسانه لاسرسي په برخه کې هم رغنده رول ولوبوي.
د یادونې وړ ده چې د اداري خدماتو ریاست د مرکزي ډیپو ډېټابېس ډېر پیچلی او مهم وو، خو په کمه موده کې په معياري ډول جوړ او ګټې اخیستنې ته وسپارل شو. همدارنګه تر دې وړاندې د مالي او اداري چارو عمومي ریاست او د ټولنیزو خدمتونو ریاست لپاره هم ورته ډېټابېسونه جوړ شوي وو.
