د شهيدانو او معلولينو په چارو کې د دولت وزارت اداري هئيت او د کمک مؤسسې مسولينو ترمنځ د همغږۍ ناسته وشوه
د شهيدانو او معلولينو په چارو کې د دولت وزارت اداري هئيت او د کمک مؤسسې مسولينو ترمنځ د همغږۍ ناسته وشوه
نن شنبه (۵،تلې)، د شهيدانو او معلولينو په چارو د دولت وزارت مديره هئيت او د کمک نړيوالې مؤسسې د مرکزي زون چارواکو سره د همغږۍ د لا زياتوالي په موخه په ياد وزارت کې ناسته ترسره کړه.
د شهيدانو او معلولينو په چارو کې د دولت وزارت د تخنيکي چارو مرستيالې جمیلې نورستانۍ د وزارت په استازولۍ له يادې مؤسسې وغوښتل، چې د جګړو ځپلو هېوادوالو سره دې د مرستو ټول فعاليتونه له وزارت سره په پوره همغږۍ ترسره کړي او د مستحقينو په تشخيص کې دې له شفافيت کار واخلي.
د کمک مؤسسې د مرکزي زون مسوول هم له ياد وزارت سره د همغږۍ پر زياتوالي ټينګار وکړ او ژمنه يې وکړه، چې د شهيدانو وارثينو او معلولينو سره د مرستې او همکارۍ د راتلونکي نوي کال ټولې برنامې او پلانونه له وزارت سره شريکوي او په ګډه به يې د پلې کېدو زمينه برابروي.
د شهيدانو او معلولينو په چارو کې د دولت وزارت هڅه کوي، چې له نړيوالو موسسو او خيريه بنسټونو سره د پوره همغږۍ، همکارۍ او شفافيت له مخې د جګړو اغيزمنو هېوادوالو لپاره په شفاف ډول خدمتونه وړاندې کړي.
