د زابل ولايت د شهیدانو او معلولینو چارو رياست لپاره نوی رئيس د محترم مولوي کليم الله افغان له لوري کارکوونکو ته رسماً معرفي شو
د افغانستان اسلامي امارت د رياست الوزراء عالي مقام د حکم پر اساس محترم مولوي فضل الدین د زابل ولايت د شهیدانو او معلولینو چارو رياست د نوي رئيس په توګه او محترم ملا عبدالرحمن فهيم په همدې رياست کې د نوي آمر په توګه د مالي او اداري چارو عمومي رئيس محترم مولوي کليم الله افغان له لوري د يو لړ مراسمو په ترڅ کې کارکوونکو ته په رسمي توګه معرفي او په کار یې پیل وکړ.
په هغو مراسمو کې چې په همدې موخه د زابل ولایت د شهیدانو او معلولینو ریاست کې جوړ شوي وو، په کې د شهیدانو او معلولینو وزارت د مالي او اداري چارو عمومي رئیس محترم مولوي کلیمالله افغان، د یاد وزارت د دعوت او ارشاد رئیس محترم مفتي عبدالاحد مسعود، د مقام ولایت د کارکوونکو چارو آمر او یو شمېر ولایتي مسؤلینو ګډون کړی وو.
په دې مراسمو کې د مالي او اداري چارو عمومی رئیس محترم مولوي کلیمالله افغان د یتیمانو، کونډو مېرمنو او معلولینو تثبیت او ثبت او همدارنګه هغوی ته د وزارت د منظور شوې طرحې سره سم د میاشتنیو نغدي مرستو ورکول د شهیدانو او معلولینو چارو وزارت د اساسي او کلیدي مسؤلیتونو څخه وبلل.
د مالي او اداري چارو عمومي رئیس د ادارو ترمنځ د همغږۍ پر اهمیت ټینګار وکړ او د زابل ولایت له مسؤلینو څخه یې وغوښتل چې د شهیدانو او معلولینو له نوي رئیس سره په بشپړه او مؤثره توګه همکاري وکړي، ترڅو سپارل شوې چارې په ښه ډول ترسره شي او د شهیدانو کورنیو او معلولینو ته ښه خدمتونه وړاندې شي.
همدارنګه د زابل ولایت مقام د کارکوونکو چارو آمر د شهیدانو او معلولینو ریاست نوي رئیس ته د مبارکۍ ویلو ترڅنګ ډاډ ورکړ چې د ولایت مقام لکه د تېر په شان خپلو همکاريو ته دوام ورکوي او د شهیدانو کورنیو او معلولینو ته يې د غوره خدمتونو وړاندې کولو په برخه کې بشپړ چمتووالى وښود.
د یادونې وړ ده چې محترم مولوي فضلالدین مخکې له دې د زابل ولایت د شهیدانو او معلولینو د چارو آمر په توګه دنده تر سره کوله.
