د هلمند ولایت د شهیدانو او معلولینو چارو رئیس د یاد ولایت یو شمېر ولسوالیو ته سفر وکړ
د هلمند ولایت د شهیدانو او معلولینو چارو رئیس محترم الحاج ملا صدوخان حق شناس چې د ریاست اړوند کارکوونکو یې ملتیا کوله، په بغني، باغران او ناومیش ولسوالیو کې د مجردو شهیدانو کورنیو او د خاصو شهیدانو کورنیو سره له نږدې ولیدل، د هغوی اړتیاوې او ستونزې یې واوریدې او ورسره یې یو اندازه نغدي مرستې ترسره کړې او د یو شمېر معلولینو سره یې هم لیدنه وکړه.
محترم الحاج ملا صدوخان حق شناس د ذکر شویو ولسوالیو له ولسوالانو، امنیه قوماندانانو، د استخباراتو له مدیرانو سره وکتل، په دې لیدونو کې د شهیدانو او معلولینو چارو محترم رئیس د یتیمانو، کونډو او معلولیت لرونکو وګړو د وضعیت د ښه والي په اړه خبرې وکړې او د یادو ولسوالیو د مسؤلینو څخه یې وغوښتل چې په یادو ولسوالیو کي د شهیدانو او معلولینو چارو مدیریتونو سره ګډه همکاري وکړي، څو اړمنو کورنیو ته د مرستو رسولو بهیر لا منظم، چټک او شفاف شي.
په ورته وخت کې د یادو ولسوالیو مسؤلینو د محترم رئیس صاحب د سفر هر کلی وکړ او ډاډ یې ورکړ چې د یاد مدیریتونو سره به په ټولو اړوندو برخو کې بشپړه او هر اړخیزه همکاري کوي، څو اړمنو کورنیو ته خدمتونه په ښه ډول ورسېږي.
