په بغلان ولایت کې پر (۷۰۰) تنو یتیمانو، کونډو او معلولینو باندې خوراکي توکي ووېشل شول
د بغلان ولایت د شهيدانو او معلولینو چارو رياست د یوې خیریه مؤسسې سره په همغږۍ د دې ولایت د مرکز په شمول په مرکزي بغلان، برکې، دوشي، خنجان او د نهرین ولسوالېو (۷۰۰) تنو مستحقو یتیمانو، کونډو او معلولینو باندې خوراکي توکي چې په هغه کې اوړه، وریجې، لوبیا، بوره، غوړي او نخود شامل وو، ووېشل.
د مرستو د وېش پرمهال د بغلان ولایت د شهیدانو او معلولینو چارو آمر محترم قاري عبدالحکیم نافذ د یادې خیریه مؤسسې له مسؤلینو مننه وکړه او له هغوی وغوښتل تر څو د دې ولایت له یتیمانو، کونډو او معلولینو سره لا زیاتې مرستې وکړي او هغو کسانو چې مرستې یې نه دي ترلاسه کړي، هغوی هم له مرستو څخه برخمن شي.
