د شهيدانو او معلولينو چارو وزير محترم الحاج ملا عبدالمجید آخند د سرپل ولايت له والي سره وکتل
د شهیدانو او معلولینو چارو وزیر محترم الحاج ملا عبدالمجید آخند نن په خپل کاري دفتر کې د سرپل ولایت له والي محترم ملا احمدشاه دین دوست او راغلي پلاوي سره وکتل.
په دې لیدنه کې په سرپل ولایت کې یتیمانو، کونډو او معلولیت لرونکو وګړو ته د غوره او اغېزمنو خدمتونو د وړاندې کولو پر څرنګوالي، د هغوی ستونزو او اړتیاوو ته د پر وخت رسېدنې او د لازمو اسانتیاوو د برابرولو په اړه هر اړخیزې خبرې وشوې.
محترم الحاج ملا عبدالمجید آخند د سرپل ولایت له والي سره د لیدنې پر مهال وویل، د شهیدانو او معلولینو چارو وزارت د یتیمانو، کونډو او معلولینو ملاتړ خپل مهم مسؤلیت ګڼي او د هغوی د ستونزو د حل لپاره جدي هڅې کوي، محترم وزير صاحب ډاډ ورکړ چې وزارت به د سرپل ولایت له سیمهییزې ادارې سره په همغږۍ د یادو قشرونو لپاره لا ښه او منظم خدمتونه وړاندې کړي او په دې سره به د هغوی حقوق لا خوندي شي.
همداراز، د سرپل ولایت محترم والي د شهیدانو کورنیو او معلولیت لرونکو وګړو وضعیت ته د ځانګړې او هر اړخیزې پاملرنې پر اهمیت ټینګار وکړ، نوموړي له محترم وزیر صاحب څخه وغوښتل چې د سرپل ولایت د یتیمانو، کونډو او معلولینو لپاره حمایوي پروګرامونه لا پراخ کړي، د تثبیت او ثبت په بهیر کې نورې اسانتیاوې رامنځته کړي او د یادو قشرونو لپاره مناسب او غوره چاپېریال برابر کړي.
