د شهیدانو او معلولینو چارو وزارت او د (MAPWO) خیریه مؤسسې ترمنځ د هوکړه لیک لاسلیک

د شهیدانو او معلولینو چارو وزارت د یتیمانو او معلولینو د اقتصادي ځان بسیاینې په موخه، د (۲۰۰) زره و (۴۹۰) ډالرو په ارزښت د (MAPWO) خیریه مؤسسې سره د همکارۍ هوکړه لیک لاسلیک کړ، چې له مخې به یې، په پکتیا ولایت کې د شهیدانو او معلولینو له کورنيو څخه (۱۰۰۰) تنو مستحقو کسانو لپاره د خیاطۍ او لبنیاتو د تولید په برخو کې د حرفوي زده کړو پروګرامونه پيل شي، اړین وسایل او لوازم به ورته واخیستل شي او په اختیار کې به یې ورکړل شي، تر څو هغوی وکولای شي د کوچنیو کاروبارونو په پیل کولو سره اقتصادي ځان بسیاینې ته ورسیږي.

یاد هوکړه لیک د شهیدانو او معلولینو چارو وزارت د بهرنیو اړیکو، پلان او تقنین چارو رئیس محترم ملا صدوخان حق شناس او د (MAPWO) خیریه مؤسسې رئیس محترم جمال ناصر ترمنځ لاسلیک شو، چې د تطبیق چارې به یې د پکتیا ولایت د شهیدانو او معلولینو چارو ریاست سره په همغږۍ د (۶) میاشتو په موده کې بشپړې شي.

محترم ملا صدوخان حق شناس د هوکړه لیک د لاسلیک پر مهال د مؤسسې د مسؤلینو له خوا یې یتیمانو، کونډو مېرمنو او معلولینو ته د ځانګړې پاملرنې څخه مننه وکړه، د شهیدانو ورثه وو او معلولینو سره یې د همکاریو د پراختیا غوښتنه وکړه او ټینګار وکړ چې هغوی ته د مرستو په وېشلو کې باید لومړیتوب ورکړل شي.