د شهیدانو کورنیو او معلولیت لرونکو وګړو ته د دوی د حقوقو د ورکړې پروسې ساده کولو په اړه ناسته وشوه
د شهیدانو کورنیو او معلولیت لرونکو وګړو ته د دوی د حقوقو د ورکړې پروسې ساده کولو په اړه ناسته وشوه
نن سه شنبه (د زمري ۲۹) د شهیدانو او معلولینو په چارو کې د دولت وزیر ښاغلي لعل الدین آریوبي د جلالتماب جمهور رییس د حکم پر اساس د شهیدانو او معلولینو په چارو کې د جمهور رییس سلاکار ښاغلي عمرا خان منیب، د خزاینو عمومي رییس ښاغلي اختیار ولي، د کورنیو چارو وزارت د مالي او بودیجې عمومي رییس ښاغلي نصیر زید، د مالیې وزارت او د ملي امنیت شورا استازو سره په خپل کاري دفتر کې د شهیدانیو کورنیو او معلولیت لرونکو وګړو ته د پیسو ورکړې سیستم د ساده کولو، آسانه کولو او روڼتیا په موخه غونډه وکړه.
په دې ناسته کې د یادو ادارو ټولو استازو د شهیدانو کورنیو او معلولیت لرونکو وګړو ته د دوی د حقوقو ورکړې سیستم د اسانه کولو او دې برخه کې د روڼتیا رامنځته کولو په مختلفو لارو چارو او مېکانېزمونو د هر اخیز بحث او نظریاتو شریکولو تر څنګ یو لړ تدابیر ونیول.
ښاغلي آریوبي ټینګار وکړ، چې د یاد سیستم د ساده کولو چارې باید د ټولو اړوندو ادارو په همغږۍ او همکارۍ ژر پیل او عملي شي، تر څو د شهیدانو کورنیو او معلولیت لرونکو وګړو ته د خپلو حقوقو د ترلاسه کولو په برخه کې نورې اسانتیاوې هم رامنځته شي.
