د شهیدانو او معلولینو چارو وزارت د اسلامي هوساینې نړیوالې مؤسسې سره د یتیمانو لپاره د اقتصادي ځان بسیاینې په موخه د همکارۍ هوکړه لیک لاسلیک کړ
یاد هوکړه لیک د شهیدانو او معلولینو چارو وزارت د بهرنيو اړیکو او پلان رئیس محترم ملا صدوخان حق شناس او د اسلامي هوساینې نړیوالې مؤسسې رئیس محترم محمد ذوالقرنین عباس ترمنځ لاسلیک شو، چې پر اساس به یې، په کابل او بلخ ولایتونو کې (۸۰) تنو یتیمانو ته د کاري فرصتونو رامنځته کولو، د اقتصادي ځان بسیاینې او نورو برخو کې خدمتونه وړاندې شي.
د هوکړه لیک د لاسلیک پر مهال محترم ملا صدوخان حق شناس د شهیدانو او معلولینو چارو وزارت له لوري د ثبت شويو یتیمانو، کونډو او معلولینو د آمار او ارقامو او هغوی ته د خدمتونو وړاندې کولو د څرنګوالي په هکله تفصیلي خبرې وکړې او زیاته یې کړه: په هېواد کې د څو لسیزو جګړو له امله ډیری شمېر یتیمان، کونډې او معلولین راپاتې شوې دي، په کار ده چې هغوی ته د ژوند په بېلابېلو برخو کې ښه خدمتونه وړاندې شي.
په ورته وخت کې د اسلامي هوساینې نړیوالې مؤسسې رئیس هم د خپلو ترسره شويو فعالیتونو په هکله معلومات وړاندې کړل او ژمنه یې وکړه چې د شهیدانو او معلولینو چارو وزارت سره په همغږۍ به یتیمانو او معلولینو ته د مرستو ترسره کولو زمینه برابره کړي.
د یادونې وړ ده چې د دې پروژې ټولیز ارزښت (۱۶۸) زره او (۸۹۰) امریکایي ډالره کېږي چې د دوو کلونو په موده کې به تطبیق شي.
