د فاریاب ولایت د شهیدانو او معلولینو چارو په ریاست کې د یتیمانو، کونډو او معلولینو د ثبت او راجسټر په موخه نوی الکترونیکي سیسټم فعال او ګټې اخیستنې ته وسپارل شو
په هغه پروګرام کې چې د نوي الکټرونیکي سیسټم د فعالولو په موخه د فارياب ولايت د شهيدانو او معلولینو چارو په رياست کې جوړ شوی وو، په هغه کې د دې وزارت د ډېټابیس او معلوماتو د سیسټم رئیس محترم مولوي باقي بالله فضلي، د فاریاب ولایت د والي مرستیال محترم الحاج مولوي حمیدالله ارشاد، د شهیدانو او معلولینو چارو رئیس محترم مولوي محمد نادر خالد، د یاد ولایت ځینو رئیسانو، آمرینو او کارکوونکو ګډون کړی وو.
په دې پروګرام کې د یاد ولایت مرستیال والي محترم الحاج مولوي حميدالله ارشاد د شهیدانو او معلولینو چارو له ریاست سره یې د بشپړې همکارۍ ډاډ ورکړ او ویې ویل: د دې سیسټم فعالول دا څرګندوي چې د افغانستان اسلامي امارت د یتیمانو، کونډو او معلولینو قربانېو ته درناوی لري.
ورپسې د ډېټابېس او معلوماتو د سیسټم رئیس محترم مولوي باقي بالله فضلي د نوي الکټرونیکي سیسټم په اهمیت او ارزښت خبرې وکړې او د مرستیال والي څخه یې وغوښتل تر څو یتیمانو، کونډو ته د الکټرونیکي پیژند پاڼو او فوتي کارټونو په وېش کې د شهيدانو او معلولینو چارو رياست سره همکاري وکړي.
همداراز په دې پروګرام کې د فارياب ولايت د شهيدانو او معلولینو چارو رئيس محترم مولوي محمد نادر خالد د یاد ریاست د لاسته راوړنو او فعاليتونو په هکله هر اړخیز معلومات وړاندې کړل.
د يادونې وړ ده، چې تر دې وړاندې هم د دې وزارت د تخنيکي او مسلکي ټيم له خوا په زابل، ارزګان، بادغیس او غور ولايتونو کې د يتيمانو، کونډو او معلولينو د ثبت په موخه نوی الکټرونیکي سيسټم فعال او ګټې اخيستنې ته سپارل شوی وو.
