د شهیدانو او معلولینو چارو وزارت کارکوونکو ته د امربالمعروف او نهي عن المنکر قانون د اهمیت او تطبیق په هکله د پوهاوي پروګرام ترسره شو
د شهیدانو او معلولینو چارو وزارت د دعوت او ارشاد ریاست له لوري د امربالمعروف او نهي عن المنکر قانون د پلي کیدو د اهمیت په هکله په جوړ شوي پروګرام کې د مسلکي او تخنیکي چارو مرستیال محترم الحاج ملا عبدالرزاق آخند، د شهیدانو او معلولینو چارو مرستیال محترم شیخ صاحب عبدالحکیم حقاني، د مالي او اداري چارو عمومي رئیس محترم مولوي کلیم الله افغان، د اړوند څانګو رئيسانو، آمرینو او ټولو کارکوونکو ګډون کړی وو. محترم شیخ صاحب عبدالحکیم حقاني د اسلامي نظام په چوکاټ کې د مشرانو د اوامرو اطاعت او د امر بالمعروف او نهي عن المنکر قانون د تطبیق پر اهمیت ارزښتناکه وینا وکړه او زیاته یې کړه چې په اسلامي نظام کې د امیر د اوامرو اطاعت واجب دی، عالیقدر امیرالمؤمنین حفظه الله تعالی د خپل شفقت، مهربانۍ او د اسلامي شریعت د احکامو په رڼا کې داسې قانون وضع کړی چې د خلکو د دنیا او آخرت خیر، هوساینه او نېکمرغي پکې نغښتې ده. محترم شیخ صاحب وویل: مجاهدینو د تېر شل کلن جهاد پر مهال د الله تعالی جل جلاله د رضا د ترلاسه کولو لپاره ډېرې ستونزې او سختۍ ګاللي او په کار ده چې اوس هم باید خپل ټول خدمتونه یوازې د الله تعالی جل جلاله د رضا لپاره ترسره کړو. نوموړي زیاته کړه چې موږ ټول د یوې عقیدې، یوه وطن او د یوه سپېڅلي اسلامي نظام تر چتر لاندې ژوند کوو؛ له همدې امله زموږ ګډ مسؤلیت دی چې د هېواد د پرمختګ او د نظام د پیاوړتیا لپاره په اخلاص خدمت وکړو. ورپسې د مالي او اداري چارو عمومي رئیس محترم مولوي کلیم الله افغان، د امر بالمعروف او نهی عن المنکر د قانون د پلي کېدو پر اهمیت او ارزښت مفصله وینا وکړه. نوموړي وویل چې دغه قانون د عاليقدر امیرالمؤمنین حفظه الله تعالی په لارښوونه، د قرآن عظیم الشان د احکامو او د رسول الله صلی الله علیه وسلم د مبارکو احادیثو په رڼا کې په لنډ وخت کې ترتیب او نافذ شوی دی او په دې قانون کې د ټولنې د ټولو وګړو شرعي او قانوني حقوق خوندي شوي دي. محترم مولوي کلیم الله افغان همداراز څرګنده کړه چې د شهیدانو او معلولینو چارو په وزارت کې د یاد قانون احکام په بشپړ ډول عملي شوي او ټول کارکوونکي د خپلو دندو د ترسره کولو پر مهال د دغه قانون احکام په پام کې نیسي. په دې غونډه کې د مالي او حسابي چارو رئیس محترم مولوي محمد امین دروېش د قرآن عظیم الشان د مبارکو آیتونو په رڼا کې د یتیمانو، کونډو او اړمنو کسانو د لاسنیوي، پالنې او خدمت کولو پر اهمیت هر اړخیزې خبرې وکړې او وې ویل چې زموږ او ستاسو چارې له هغو کسانو سره تړلې دي چې د هغوی په اړه د جنت زېری او د دوزخ وعید دواړه راغلي دي. له همدې امله اړینه ده چې د هغوی ستونزو او اړتیاوو ته په پوره مسؤلیت، اخلاص او ښه ډول رسېدنه وشي، د دفترونو دروازې یې پرمخ و نه تړل شي، مشروع اړتیاوې یې پوره شي او په ورین تندي، نیک چلند او غوره اخلاقو خدمتونو ورته وړاندې شي.
