د زابل ولایت د شهیدانو او معلولینو چارو ریاست د دوو پروژو د پرانیستلو تر څنګ، پر (۲۴۰) تنو مستحقو یتیمانو د حفظ الصحې توکي ووېشل
د زابل ولایت د شهیدانو او معلولینو چارو ریاست د اچ، اچ، آر، دي خیریه مؤسسې په همغږۍ د دې ولایت اړوند د حضرت عمر بن خطاب رضي الله عنه په دارالایتام کې د تصفیه شویو اوبو د یوې شبکې او څلورو بابو تشنابونو د جوړولو چارې بشپړې کړې. یاده پروژه چې ټولیز لګښت یې دیارلس زره (۱۳۰۰۰) امریکايي ډالره وو، د خلکو د ګټې اخیستنې لپاره چمتو او پرانیستل شوه.
د یادې پروژې د پرانيستې په پروګرام کې د زابل ولايت د شهيدانو او معلولينو چارو رئيس محترم ملا عبدالحکیم دانش، د اقتصاد رياست، د جهادي مدرسې استازو او د اچ، اچ، آر، ډي نړېوالې مؤسسې ولايتي مسؤل محترم اسدالله عليزي هم شتون درلود.
محترم ملا عبدالحکیم دانش د یادې مؤسسې له مسؤل څخه مننه وکړه چې تل یې د زابل ولايت د شهيدانو او معلولينو چارو رياست سره په همغږۍ د یتیمانو او معلولینو لاسنیوی کړی دی.
د یادونې وړ ده چې پر (۲۴۰) تنو یتیمانو باندې د حفظ الصحې توکي هم ووېشل شول.
