د ریاست الوزرا سیاسي مرستیال او کفیل مولوي عبدالکبیر د شهیدانو او معلولینو چارو وزارت له مرستیال شیخ عبدالحکیم حقاني سره لیدنه وکړه
په دې لیدنه کې ښاغلي شیخ صاحب عبدالحکیم حقاني د هېواد په کچه د یتیمانو، کونډو او معلولینو پر وضعیت خبرې وکړې او زیاته یې کړه چې په تېر مالي کال کې د حکومت لخوا د شهیدانو او معلولینو چارو وزارت ته ځانګړې شوې بودیجه په پوره شفافیت سره مصرف شوې ده.
نوموړي همداراز زیاته کړه؛ د اسلامي امارت د واکمنۍ پر مهال د یتیمانو، کونډو او معلولینو د لاسنیوي په برخه کې د افغان سوداګرو او په بهر کې د مېشتو هېوادوالو مرستې ډېرې شوې چې د شهیدانو او معلولینو چارو وزارت له لارې پر مستحقو او ثبت شویو یتیمانو، کونډو او معلولینو وېشل کېږي.
ښاغلي شیخ صاحب عبدالحکیم حقاني وویل؛ په تېرو نږدې دوو کلونو کې د جګړې له امله د کونډو او یتیمانو د زیاتېدو شمېره صفر ته راښکته شوې ده.
په دې لیدنه کې د ریاست الوزرا سیاسي مرستیال او کفيل ښاغلي مولوي عبدالکبیر هم خبرې وکړې او زیاته یې کړه چې د کډوالو چارو وزارت دې له نورو اړوندو ادارو سره په همغږۍ د یتیمانو د لاسنیوي تر څنګ هغوی ته د دیني او عصري زدکړو لا ډېره زمینه برابره کړي.
نوموړي همداراز وویل چې د معلولینو او د دې برخې نورو کسانو ته د مرستو د وېش لړۍ دې له توپیر پرته مخکې لاړه شي او د هغوی وړتیاوو ته په پام دې ورته د کاري فرصتونو پر برابرولو فکر وشي.
