د شهیدانو او معلولینو په چارو کې د دولت وزارت ویاند او سلاکاره وستایل شوه
د شهیدانو او معلولینو په چارو کې د دولت وزارت ویاند او سلاکاره وستایل شوه
د شهیدانو او معلولینو په چارو کې د دولت وزیر ښاغلي لعل الدین آریوبي د جلالتماب جمهور رییس له لوري د وزارت ویاند ضیاالحق فضلي او د مالي، تدارکاتو او بشري سرچینو په چارو کې د مقام سترې سلاکارې آغلې صفیه انوري ته رالیږل شوي ستاینلیکونه وسپارل او دواړو ته یې د دغې سترې لاسته راوړنې مبارکي وویله.
په دې غونډه کې د نظامي شهیدانو او معلولینو چارو د انسجام مرستالې صبری اندړ، د مقام ستر سلاکار محمد دین قانع، رییسانو، مشاورینو او نورو مسولینو ګډون درلود.
ښاغلي آریوبي ضیاالحق فضلي او مېرمن صفیه انوري د وزارت مهم او اغېزناک ظرفیتونه وګڼل وویل: د جمهور رییس له لوري دوی ته رالېږل شوي ستاینلیکونه د دوی د صادقانه کار، مثبتو کړنو او سختو هلو ځلو پایله ده. دا ستاینلیکونه د دوی د کارونو له ارزونې وروسته ورکړل شوي دي.
ښاغلي آریوبي څرګنده کړه، چې یاد ستاینلیکونه لوړ معنوي ارزښت لري او د ټولې ادارې مشترک ویاړ دی. زیاته یې کړه، چې دغسې ستاینې د مسولینو په هڅونه او لا ډېر کار کولو کې اساسي نقش ترسره کوي.
ښاغلي فضلي او مېرمن انوري د ښاغلي وزیر او جلالتماب جمهور رییس له باور او ستاینې د مننې ترڅنګ ژمنه وکړه، چې له دې وروسته به هم خپلې اړوندې چارې او مسولیتونه په بشپړه ریښتینولۍ، هېوادني احساس او ژمنتیا ترسره کوي.
د وزارت نورو مسولینو هم د وزارت د ویاند او سلاکارې د کړنو په اړه خبرې وکړې او دواړه یې د ستاینلیکونو مستحق وګڼل.
