د شهیدانو او معلولینو چارو وزارت له لوري د یو شمېر مجاهد معلولینو سره نغدي مرسته ترسره شوه
د شهیدانو او معلولینو چارو وزارت د ننګرهار، لوګر، خوست او کنړ ولایتونو اړوند له یو شمېر مجاهد معلولینو سره چې د تېر شل کلن اشغال پر مهال یې د خپل بدن دوه غړي له لاسه ورکړي وو، هغوی سره یي یو اندازه نغدي مرسته ترسره کړه.
یاده نغدي مرسته د ځانګړې ټاکل شوې کمېټې له لوري چې د کارکوونکو د چارو رئيس محترم مولوي محمد موسی صدیقي، د معلولینو چارو رئیس محترم مولوي شاه ولي مسافر او د مالي او حسابي چارو رئیس محترم مولوي محمد امین دروېش یې غړیتوب درلود، مستحقو معلولینو سره ترسره شوه.
همداراز د یادې کمېټې غړو د معلولینو ستونزې او غوښتنې له نږدې واورېدې او د هغوی سره یې خواخوږي او همدردي هم څرګنده کړه.
د یادونې وړ ده چې تر دې وړاندې هم په زابل، غزني، پروان، کاپيسا، هلمند او بادغیس ولایتونو کې د ورته مجاهد معلولینو سره نغدي مرستې ترسره شوې دي.
